ՀԱՄԱՍ-ը մերժել է հրադադարի վերաբերյալ Իսրայելի առաջարկը

Պաղեստինյան ՀԱՄԱՍ խմբավորումը մերժել է վեց շաբաթով հրադադարի մասին Իսրայելի առաջարկը՝ իսրայելցի ողջ մնացած պատանդների կեսին ազատ արձակելու և զինաթափվելու դիմաց, հայտնում է BBC-ն։

«Իսրայելն իր առաջարկը շարժմանը փոխանցել է Եգիպտոսի միջոցով՝ ՀԱՄԱՍ-ին կոչ անելով զինաթափվել՝ առանց Իսրայելի կողմից պատերազմը դադարեցնելու կամ Գազայի հատվածից հեռանալու պարտավորության: Այդ պատճառով ՀԱՄԱՍ-ն ուղղակիորեն մերժել է առաջարկը»,- հայտնել է բանակցություններին ծանոթ պաղեստինցի պաշտոնյաներից մեկը:

Նրա խոսքով՝ Իսրայելը ժամանակ է ձգձգում, փորձում է վերադարձնել պատանդներին՝ առանց պատերազմի ավարտի։

ՀԱՄԱՍ-ն այս դիրքորոշումն անընդունելի է համարում, քանի որ, ըստ նրա, ցանկացած ապագա համաձայնագիր պետք է ներառի պատերազմը դադարեցնելու և Գազայից հեռանալու Իսրայելի պարտավորությունը։

ՀԱՄԱՍ-ի պատվիրակությունը երկուշաբթի կարճատև այցից հետո հեռացել էր Կահիրեից: