Ուկրաինական պատվիրակությունը ժամանել է Փարիզ

Ուկրաինայի նախագահի գրասենյակի ղեկավար Անդրեյ Երմակը, արտգործնախարար Անդրեյ Սիբիհան և պաշտպանության նախարար Ռուստեմ Ումերովը ժամանել են Փարիզ՝ հանդիպելու «Կամեցողների կոալիցիայի» (Ուկրաինային աջակցել կամեցող երկրների միություն) և Միացյալ Նահանգների ներկայացուցիչների հետ։
Այս մասին Երմակը հայտնել է իր Telegram ալիքում։

Նրա խոսքով՝ այցի շրջանակներում նախատեսվում են երկկողմ և բազմակողմ հանդիպումներ «Կամեցողների կոալիցիայի» և անվտանգությունը երաշխավորելու ունակ պետությունների ներկայացուցիչների, մասնավորապես՝ Ֆրանսիայի, Գերմանիայի և Մեծ Բրիտանիայի ներկայացուցիչների հետ։ Նախատեսվում են նաև հանդիպումներ ԱՄՆ ներկայացուցիչների հետ, ովքեր ներկայումս գտնվում են Ֆրանսիայում, հայտնել է Երմակը։

«Մենք աշխատում ենք Ուկրաինայի և ողջ Եվրոպայի անվտանգության համար կարևոր հարցերի շուրջ»,- ընդգծել է Երմակը։
Ապրիլի 16-ին Politico-ն հայտնել էր, որ ԱՄՆ հատուկ ներկայացուցիչ Սթիվ Ուիթքոֆը և պետքարտուղար Մարկո Ռուբիոն Փարիզ կժամանեն շաբաթվա վերջին։