Զելենսկին Ռուսաստանին առաջարկում է զերծ մնալ հեռահար հարվածներից

Ուկրաինայի նախագահ Վլադիմիր Զելենսկին առաջարկել է Ռուսաստանին 30 օրով զերծ մնալ քաղաքացիական ենթակառուցվածքների վրա հեռահար անօդաչու թռչող սարքերով հարվածներից և հրթիռակոծումներից՝ երկարաձգման հնարավորությամբ։

Իր թելեգրամ-ալիքում Զելենսկին գրել է, որ օրվա սկզբից ռուսական զորքերն ավելի քան երկու հազար անգամ խախտել են Պուտինի հայտարարած «Զատկի զինադադարը», սակայն հեռահար հարվածներ չեն գրանցվել։

«Արդեն 67 ռուսական գրոհ է եղել մեր դիրքերի վրա տարբեր ուղղություններով, և ամենից շատ՝ Պոկրովսկիում։ 1355 կրակոց, որից 713-ը՝ ծանր զինատեսակներով, 673-ը՝ FPV-ի կիրառմամբ։ Փաստորեն, ռազմաճակատի բոլոր հիմնական ուղղություններով Ռուսաստանը չպահեց իր իսկ խոստացած զինադադարը»,- ասել է Զելենսկին Ուկրաինայի Զինված ուժերի գլխավոր հրամանատար Ալեքսանդր Սիրսկու զեկույցից հետո։

Զելենսկին ասել է, որ կիրակի օրը Ուկրաինայում օդային հարվածներ չեն եղել, և առաջարկել է երկարաձգել հեռահար հարվածների արգելքը։

«Այսպիսով, սա է ձեռք բերված լռության ձևաչափը, որը շարունակելն ամենահեշտն է: Ուկրաինան առաջարկում է առնվազն 30 օրով զերծ մնալ քաղաքացիական ենթակառուցվածքի վրա հեռահար անօդաչու թռչող սարքերի և հրթիռների հարվածներից»,- գրել է Զելենսկին։