«Բաքվում ընթացող դատավարությունը կեղծ գործընթաց է»․ Քնութ Ռաուֆ

Արցախցիների իրավունքների պաշտպանության խորհրդի ներկայացուցիչները ապրիլի 21-ին Ազատության հրապարակի վրանում ընդունել են գերմանական իրավապաշտպան կազմակերպության ներկայացուցիչ Քնութ Ռաուֆին: «Մենք հակամարտությունների և դրանց արդյունքում տեղահանված անձանձ իրավունքների պաշտպանությամբ զբաղվող միջազգային կազմակերպություն ենք։ Հայաստանում ենք՝ ծանոթանալու ԼՂ-ից տեղահանված անձանց վիճակին ու նրանց պահանջներին։

Դժբախտաբար, քաղաքական և այլ պատճառներով միջազգային հանրությունը բավարար չափով տեղեկացված չէ այս հակամարտությունից, և դա անընդունելի է, քանի որ մեկուկես տարի առաջ ԼՂ-ից բնակչության բռնի տեղահանման ընթացքում տեղի են ունեցել մարդու իրավունքների կոպիտ խախտումներ և ռազմական հանցագործություններ։ Միջազգային հումանիտար իրավունքի համաձայն՝ այդ խախատումների մեղավորները պետք է պատասխանատվության ենթարկվեն, և մեր նպատակը դրան հասնելն է։

Ինչ վերաբերում է Բաքվում պահվող հայ ռազմագերիներին, եթե նրանց հանդեպ դատավարություն է իրականացվում, այն պետք է համապատասխանի Ժնևի կոնվենցիայի, միջազգային իրավունքի նորմերին։ Որքանով ես տեղյակ եմ՝ Բաքվում ընթացող դատավարությունը կեղծ դատական գործընթաց է, ինչը նույնպես անընդունելի է»,- լրագրողների հետ զրույցում ասել է Ռաուֆը։