«Պարեկների մեքենաների տանիքին կտեղադրվեն սարքեր, որոնք կտուգանեն ծխող, հեռախոսով խոսող կամ ամրագոտի չկապած վարորդներին». Արփինե Սարգսյան

Ներքին գործերի նախարար Արփինե Սարգսյանի հետ հարցազրույցում Պետրոս Ղազարյանը նկատեց, որ Հայաստանում շատ բարձր է վթարների թիվը, ինչի գլխավոր պատճառներից մեկն էլ այն է, որ համատարած բոլորը խոսում են հեռախոսով և չեն տուգանվում: Նախարարը համաձայնեց՝ արձանագրելով, որ ներպետական մակարդակում ընկալումների խնդիր ունեն, որովհետև շատերը համարում են, թե ղեկին հեռախոսով զբաղվելը փոքր խնդիր է: «Հաճախ դատական համակարգերում ունենում ենք այս ակտերի բեկանումներ, որովհետև չեն գտնվում ամբողջական տեսանյութեր, որոնցով կապացուցվեր, որ տուգանված քաղաքացին խոսել է հեռախոսով: Առաջիկայում այս հարցն ամբողջապես կլուծվի, որովհետև մենք նախատեսել ենք շատ փոքր, բայց կարևոր նյութատեխնիկական հագեցվածություն պարեկների մեքենաների վրա: Փոքրիկ տեսախցիկային համակարգեր կտեղադրվեն պարեկային ծառայողների մեքենաների տանիքներին, որոնք թույլ կտան 360 աստիճանով նկարահանել շրջակայքում գտնվող մեքենաները, որոնց վարորդը հեռախոսով խոսում է, ծխում է կամ ամրագոտի չի կապել»: