«1,5 միլիոն անմեղ զոհերի սերունդներն այս 110 տարում կարող էին հասնել առնվազն 9 միլիոնի». Արմեն Եղիազարյան

ԱԺ նախկին պատգամավոր Արմեն Եղիազարյանի ֆեյսբուքյան գրառումը․ «Հայոց ցեղասպանությունից անցավ 110 տարի, որն իրականացվել էր Օսմանյան Թուրքիայի կողմից 1915թ-ին։
Այդ ժամանակ թուրքերը 1,5 միլիոն անմեղ հայերի ցեղասպանեցին։
Այդ 1,5 միլիոն անմեղ զոհերը սրբադասվեցին...
Մենք պետք է հիշենք և պահանջենք, որպեսզի այլևս չկրկնվի։
Տարբեր հաշվարկներով այդ 1,5 միլիոն անմեղ զոհերի սերունդները այս 110 տարում կարող էին հասնել մինիմում 9 միլիոնի՝ այսօրվա Հայաստանից 3 անգամ ավելի կլինեինք։ Իսկ դա ուժ էր, տնտեսություն էր, բանակ էր և խաղաղության երաշխիք, որից թուրքերը մեզ գիտակցված զրկեցին և շարունակում են զրկել։
Իսկ այսօրվա իշխանությունները կասկածի տակ են դնում այդ ցավալի իրողությունները, այդ անմեղ զոհերի փաստը կասկածի տակ են առնում, ինչ-որ նոր հաշվարկներ և ուսումնասիրություններ են ցանկանում իրականացնել պատմական փաստերի նկատմամբ, որոնք ընդունված են ամբողջ աշխարհի կողմից, բացի թուրքերից։ Այսինքն, այն, ինչ հիմա փորձում է անել ներկայիս իշխանությունը, բխում է միայն թուրքական շահից։
Ես հույս ունեմ, որ թե՛ Հայաստանի և թե՛ սփյուռքի մտածող հայը ջանք չպետք է խնայի այս ապազգային իշխանությունից ձերբազատվելու համար։ Հակառակ դեպքում մենք կկանգնենք նոր ցեղասպանության առջև կամ Արցախի պես էթնիկ զտման կենթարկվենք մեր հայրենիքում։
Պետք է հիշենք, պահանջենք և պայքարենք...»։