Վարչապետի թեկնածու էլ կա․ «Հրապարակ»

«Հրապարակ» օրաթերթը գրում է․ «Իմպիչմենտի գործընթաց սկսելու գլխավոր խոչընդոտը 2020 թվականից սկսած եղել է եւ մնում է վարչապետի թեկնածուի հարցը: Նախ, որովհետև հենց որևէ անձի անուն հայտնվում է ասպարեզում՝ դրան քարկոծողների, մերժողների ստվար շարքեր են կազմվում և հանրային աջակցությունն էլ սկսում է նվազել, որովհետև միանշանակ և բոլորի կողմից ընդունված ընդդիմադիր լիդեր չկա: Այժմ իմպիչմենտի դիմումը, որն ուղարկվել է ԱԺ բոլոր պատգամավորներին և որի մեջ բացակայում է վարչապետի թեկնածուի անունը, նորից այս հարցն է բերել առաջին պլան:

Ընդդիմադիր դաշտի դե ֆակտո ղեկավարներին՝ Ռորբերտ Քոչարյանին եւ Սերժ Սարգսյանին, կարծում են, որ սխալ է վարչապետի թեկնածու հռչակելը, որովհետև նրանց հակառեյտինգը շատ բարձր է և գործընթացը հենց այդ պատճառով կարող է ձախողվել: Որևէ այլ անունի շուրջ էլ չեն կարողանում ընդհանուր հայտարարի գալ: «Պատիվ ունեմ» խմբակցությունն ասել է, որ վարչապետի թեկնածու չունի, բայց պատրաստ է քննարկել ցանկացած թեկնածություն: «Հայաստան» դաշինքը, որին հատկապես ուղղված է այդ դիմումը և որը կարող է սկսել գործընթացը, կարծում է, որ այս ակցիան հատուկ են նախաձեռնել՝ Ռոբերտ Քոչարյանին ասպարեզից հեռացնելու, չեզոքացնելու և իրենց դեմ աշխատելու համար:

Մենք տեղեկացանք, որ իմպիչմենտի գործընթացի նախաձեռնողներից եւ ակտիվ քարոզողներից մեկը՝ Էդգար Ղազարյանը, «Հայաստան» խմբակցությանն առաջարկել է քննարկել մի շարք անուններ: Մասնավորապես, դաշինքի պատգամավոր, նախկին փոխվարչապետ Արմեն Գեւորգյանի անունը, ով աշխատել է և Ռոբերտ Քոչարյանի հետ, և Սերժ Սարգսյանի, և անգամ որոշ ՔՊ- ականների համար կարող է ընդունելի թեկնածու լինել: Նրան պատասխանել են, որ Արմեն Գևորգյանը չի ուզում: Բայց առաջարկողները վստահ են, որ դա կախված է մեկ անձի ցանկությունից՝ եթե Քոչարյանը որոշի, Գևորգյանը «կուզի», թիմն էլ տեղից կշարժվի եւ գործընթացը կսկսվի»: