ԱՄՆ-ն և Իսրայելը համատեղ հարվածներ են հասցնում Եմենին

ԱՄՆ-ն և Իսրայելը համատեղ հարվածներ են հասցնում Հոդեյդա քաղաքին, որը գտնվում է «Անսար Ալլահ» ապստամբ շարժման հութիների վերահսկողության տակ։
Այս մասին հայտնել է հութիներին պատկանող Al Masirah հեռուստաալիքը։

Ըստ ստացված տեղեկությունների՝ Հոդեյդա նավահանգստային քաղաքի տարածքում գրանցվել է առնվազն 12 ավիահարված։ Նշվում է, որ հարվածները հասցվում են ինչպես նավահանգստին, այնպես էլ միջազգային օդանավակայանին։ Ըստ առկա տեղեկությունների՝ գործողությանը մասնակցում է մինչև 30 իսրայելական կործանիչ։

Իսրայելական լրատվամիջոցները նաև հաղորդում են, որ հարվածները համակարգվում են Միացյալ Նահանգների հետ, չնայած որ ամերիկյան ուղղակի ներգրավվածություն չի գրանցվել։ Axios պորտալի տվյալներով՝ Միացյալ Նահանգները նախապես տեղեկացված է եղել Իսրայելի գործողությունների մասին։ Առանձին հաղորդագրություններ կան Եմենի մայրաքաղաք Սանայի վրա, ենթադրաբար, ԱՄՆ ռազմաօդային ուժերի կողմից հասցված հարվածների մասին։

Այս տեղեկատվության պաշտոնական հաստատում դեռևս չկա ո՛չ Իսրայելի, ո՛չ էլ ԱՄՆ-ի կողմից։