Բաքվում պահվող Վիգեն Էուլջեքչյանը 15 օր է՝ հացադուլ է հայտարարել

914

Ուրբաթ, 09 մայիսի, 2025 թ., 15:20

2020 թվականից ադրբեջանական գերության մեջ գտնվող լիբանանահայ Վիգեն Էուլջեքչյանն ավելի քան 15 օր հացադուլի մեջ էր․ երկու ամսից ավելի՝ նրան չէր թույլատրվում կապ հաստատել ընտանիքի հետ։ Այս մասին X-ի էջում ահազանգել է Հայ որբերի օգնության ընկերության (SOAR) Բուենոս Այրեսի մասնաճյուղի տնօրեն Լուսիանա Մանուկյանը։

Կառույցը նամակ է ուղարկել Կարմիր խաչի միջազգային կոմիտեին, ներկայացրել Վիգենի վիճակը և կոչ արել քայլեր ձեռնարկել։

«Վիգեն Էուլջեքջյանը, ով 2020 թվականից Ադրբեջանում պահվում է որպես հայ ռազմագերի, լուռ բողոքի ակցիա է իրականացնում հացադուլի միջոցով, որը շարունակվում է արդեն ավելի քան 15 օր։ Նրա պահանջը չափազանց պարզ է՝ հեռախոսազանգ կնոջը՝ Լինդային։ Ընդամենը մեկ զանգ՝ մարդկային տարրական կապ, միայն սա է նրան պետք»,- նշված է նամակում։

Հիշեցվում է, որ Ժնևի կոնվենցիան երաշխավորում է պատերազմի գերիների իրավունքը, այն է՝ պարբերաբար կապ պահել ընտանիքի հետ։ Այս իրավունքը, սակայն, ոտնահարվում է։ Ադրբեջանի իշխանությունները ԿԽՄԿ-ին թույլ չեն տալիս մուտք գործել այն հաստատություն, որտեղ պահվում են Վիգենն ու այլ անձինք՝ կտրելով նրանց կապն արտաքին աշխարհի հետ։ Ընդգծվում է, որ փետրվարի 21-ից ի վեր՝ Բաքվում պահվող քաղաքացիական անձինք զրկված են իրենց ընտանիքների հետ կապ հաստատելու հնարավորությունից։