Արաղչին մեկնել է Օման՝ ԱՄՆ-ի հետ անուղղակի բանակցություններ վարելու

Իրանի արտաքին գործերի նախարար Աբբաս Արաղչին մեկնել է Մուսկատ՝ մասնակցելու միջուկային ծրագրի շուրջ իրանա-ամերիկյան անուղղակի բանակցությունների չորրորդ փուլին։ Խորհրդակցությունները նախատեսված են այսօր՝ մայիսի 11-ին, հաղորդում է Tasnim-ը։

Իսլամական Հանրապետության արտաքին գործերի նախարարության ներկայացուցիչ Էսմայիլ Բաղայիի խոսքով՝ բանակցությունները կանցկացվեն Օմանի արտաքին գործերի նախարարության միջնորդությամբ, ինչպես նախորդ երեք փուլերի ժամանակ։ Իրանի պատվիրակությունը բաղկացած է փորձագետներից և տեխնիկական խմբից։ Պարոն Արաղչին բանակցային գործընթացի խնդիրներից մեկը համարել է Միացյալ Նահանգների հակասական դիրքորոշումները, հաղորդում է IRNA-ն։

Աբբաս Արաղչին հավելել է, որ Իրանի դիրքորոշումն այս հարցում հայտնի է և սկզբունքային։ Նա ընդգծեց, որ Իրանի միջուկային ծրագրի հիմունքները քննարկման ենթակա չեն։ Իրանական կողմը բանակցողներին տրամադրել է մի ծրագիր, որը երաշխավորում է միջուկային ծրագրի խաղաղ բնույթը, պնդում է նախարարը։

Բանակցություններ անցկացնելու առաջարկը ներկայացրել է Օմանի արտաքին գործերի նախարարությունը։ Մայիսի 1-ին Օմանի արտաքին գործերի նախարարությունը հայտարարեց, որ Վաշինգտոնի և Թեհրանի միջև մայիսի 3-ին նախատեսված բանակցությունների չորրորդ փուլը հետաձգվել է «լոգիստիկ պատճառներով»։ Խորհրդակցությունների երրորդ փուլը տեղի է ունեցել ապրիլի 26-ին Օմանի մայրաքաղաք Մասկատում։