«Ռուսաստանը ռազմաճակատ է ուղարկում երկու անգամ ավելի շատ զինվոր, քան Ուկրաինան». Պուտին

«Դելովայա Ռոսիա»-ի ներկայացուցիչների հետ հանդիպման ժամանակ Վլադիմիր Պուտինը հայտարարել է, որ Ռուսաստանի Դաշնությունը ռազմաճակատ է ուղարկում գրեթե երկու անգամ ավելի շատ զինծառայող, քան Ուկրաինան։ Պետության ղեկավարը հավելել է, որ Ուկրաինայի իշխանությունները, իբր, զբաղվում են «հարկադիր զորահավաքով», մինչդեռ Ռուսաստանում, նրա խոսքով, մարդիկ կամավոր են գնում պատերազմի։ «Այնտեղ հիմա 30 հազար մարդ են բռնում, բայց այստեղ տղաներն իրենք են գալիս մեզ մոտ՝ ամսական 50-60 հազարով», - ասաց Պուտինը։

Սակայն, գրում է Moscowtimes-ը, այս հայտարարությունները հակասում են արևմտյան հետախուզության գնահատականներին։ Ինչպես հաղորդում է The Wall Street Journal-ը, հղում անելով ԱՄՆ-ի և ԵՄ հետախուզությանը ծանոթ աղբյուրներին՝ ռուսական բանակում նորակոչիկների իրական թիվը ամսական կազմում է 30000-40000 մարդ։ Զորքերին միանալու հիմնական խթանն առատաձեռն կանխիկ վճարումներն են։ Բացի այդ, ուղղիչ հիմնարկներում ակտիվորեն իրականացվում է կադրերի հավաքագրում։ Սակայն այս միջոցառումները միայն հնարավորություն են տալիս լրացնել ռազմաճակատում մեծածավալ կորուստները, որոնք, ըստ բրիտանական հետախուզության գնահատականների, պատերազմի երեք տարվա ընթացքում կազմում են գրեթե մեկ միլիոն զոհված և վիրավորված անձ:

Չնայած այս բարձր գնին՝ ռուսական բանակը չի կարողացել զգալի տարածքային նվաճումների հասնել. 2024 թվականի վերջին այն գրավել էր Ուկրաինայի տարածքի ընդամենը 0.5%-ը:

Միևնույն ժամանակ, Ռուսաստանը երկար չի կարողանա պահպանել ներկայիս հավաքագրման տեմպը, ապրիլին զգուշացրել էր Պատերազմի ուսումնասիրության ամերիկյան ինստիտուտի (ISW) Ռուսաստանի վերլուծական խմբի ղեկավար Ջորջ Բարոսը։ Նրա հաշվարկներով՝ Մոսկվան ունի 12-16 ամիս՝ ռազմական գործողությունները ներկայիս ռեժիմով շարունակելու համար։ «Ռուսաստանը սահմանափակված է տնտեսական իրողություններով, ռեսուրսների պակասով և սահմանափակ մարդկային ներուժով»,- բացատրել է նա։