Դոնալդ Տուսկն սպառնում է փակել Գերմանիայի հետ սահմանը

Լեհաստանի վարչապետ Դոնալդ Տուսկը հայտարարել է, որ պատրաստ է փակել Գերմանիայի հետ սահմանը, եթե այնտեղից շարունակվի անօրինական միգրանտների մաքսանենգ տեղափոխումը։
Վերջերս Լեհաստանում պարբերաբար սկանդալներ են բռնկվում այն հաղորդագրություններից հետո, որ Գերմանիայի ոստիկանությունն անօրինական միգրանտներին չվերահսկվող սահմանով Լեհաստան է տեղափոխում։ «Ես գերմանացիներին ասացի, որ խոսք չի եղել այն մասին, որ նրանք տարբեր սահմաններ անցած միգրանտներին ուղարկեն Լեհաստան, նրանց նպատակակետը Գերմանիան էր, և հիմա նրանք նրանց ուղարկում են մեզ մոտ։ Ես պատրաստ կլինեմ փակել սահմանները»,- լեհական հեռուստատեսությամբ ասել է Տուսկը։
Նա բացատրել է, որ անհրաժեշտության դեպքում կօգտվի Եվրոպական Միության պայմանագրի դրույթներից ժամանակավորապես հրաժարվելու հնարավորությունից։
«Ես չեմ ուզում վնասել այն լեհերին, ովքեր ցանկանում են հատել սահմանները, օրինակ, որովհետև նրանք աշխատում են Գերմանիայում և ապրում Լեհաստանում կամ հակառակը։ Ես գերմանացիներին ասացի, որ եթե փորձեք մեզ մոտ միգրանտներ ուղարկել, ես կօգտագործեմ ԵՄ պայմանագրի 72-րդ կետը, որը մեզ թույլ կտա ժամանակավորապես հրաժարվել պայմանագրի բոլոր պարտավորություններից»,- ասել է վարչապետը։