ԱՄՆ-ում ինքնաթիռն ընկել է բնակելի տների վրա

Cessna 550 բիզնես ինքնաթիռը վթարի է ենթարկվել Սան Դիեգոյի բնակելի թաղամասում, հաղորդում է BBC-ն՝ հղում անելով ԱՄՆ-ի Դաշնային ավիացիոն վարչությանը։

Զոհերի կամ ինքնաթիռում գտնվողների մասին դեռևս տեղեկություններ չկան։ Այս մոդելի ինքնաթիռը կարող է տեղափոխել 6-8 մարդ։ Այն հաճախ օգտագործվում է՝ որպես բիզնես-ջեթ՝ երկու օդաչուով և մի քանի ուղևորներով, գրում է աղբյուրը։

Առավոտյան վթարի վայրում մառախուղ է եղել։ Ինքնաթիռը կործանվել է Սան Դիեգոյի Մերֆի Քանյոնի շրջանում։ Հայտնի է, որ հրդեհվել է գետնին գտնվող 15 տուն։

Իշխանությունները տարհանել են մի քանի թաղամասերի բնակիչներին։ Ինչպես մամուլի ասուլիսում հայտարարել է տեղական հրշեջ ծառայության պետի տեղակալը, «այնտեղ ամեն ինչ ռեակտիվ վառելիքով է պատված»։ Նաև, ըստ նրա, մի քանի բնակելի շենքեր անմիջականորեն վնասվել են կործանված ինքնաթիռի հարվածից։