Սլովակիայի վարչապետ Ռոբերտ Ֆիցոն ժամանել է Հայաստան

803

Կիրակի, 25 մայիսի, 2025 թ., 22:00

Սլովակիայի Հանրապետության վարչապետ Ռոբերտ Ֆիցոն ժամանել է Հայաստան։ «Արմենպրես»-ի թղթակցի հաղորդմամբ՝ Ռոբերտ Ֆիցոյին Երևանի «Զվարթնոց» օդանավակայնում դիմավորել է ՀՀ էկոնոմիկայի նախարար Գևորգ Պապոյանը։ Ավելի վաղ ՀՀ վարչապետի աշխատակազմը տեղեկացրել էր, որ Հայաստան Սլովակիայի վարչապետի պաշտոնական այցի շրջանակում նախատեսված են հանդիպումներ ՀՀ վարչապետ Նիկոլ Փաշինյանի, Հանրապետության նախագահ Վահագն Խաչատուրյանի հետ: Ռոբերտ Ֆիցոն կայցելի Ծիծեռնակաբերդի հուշահամալիր՝ հարգանքի տուրք մատուցելու Հայոց ցեղասպանության զոհերի հիշատակին: Սլովակիայի վարչապետը կմասնակցի նաև «Երևանյան երկխոսություն-2025» միջազգային համաժողովին։ Ավելի վաղ հայտնի էր դարձել, որ համաժողովին կմասնակցեն նաև Մոնտենեգրոյի արտաքին և եվրոպական գործերի փոխվարչապետ Ֆիլիպ Իվանովիչը, Հունգարիայի արտաքին գործերի նախարար Պետեր Սիյարտոն, ինչպես նաև Ֆրանսիայի արտաքին գործերի նախարար Ժան-Նոել Բարոն։