Եգիպտոսը մեղադրում է Իսրայելին Գազայում սովը որպես զենք օգտագործելու համար

Իսրայելի կողմից Գազայի հատվածում սովի օգտագործումը՝ որպես զենք, խախտում է միջազգային իրավունքի բոլոր նորմերը, «ՌԻԱ Նովոստի»-ին ասել է Եգիպտոսի արտգործնախարար Բադր Աբդել Աթին։
«Մարդկությունը չի կարող ընդունել ամեն օր տեղի ունեցող դաժան գործողությունները, ինչպես նաև սովի օգտագործումը՝ որպես կոլեկտիվ պատժի զենք. սա միջազգային և մարդասիրական իրավունքի բոլոր նորմերի կոպիտ խախտում է»,- ասել է Աբդել Աթին։ Եգիպտոսի արտգործնախարարության ղեկավարը նաև կոչ է արել միջազգային հանրությանը՝ հնարավորինս շուտ ճանաչել Պաղեստինի պետությունը և ուժեղացնել ճնշումը Իսրայելի վրա՝ Գազայի հատվածում ռմբակոծություններն ու ռազմական գործողությունները դադարեցնելու համար։

«Մենք հույս ունենք, որ կարելի է համաձայնության գալ, անհրաժեշտ է անհապաղ դադարեցնել այս անիմաստ պատերազմը։ Անհրաժեշտ է դադարեցնել պաղեստինյան ժողովրդի արյունահեղությունը և ապահովել մարդասիրական օգնության անվերապահ հասանելիությունը Գազայի հատվածի բնակիչներին, և, իհարկե, ազատ արձակել պատանդներին և պաղեստինցի բանտարկյալներին», - նշել է Աբդել Աթին։
Նախարարի խոսքով՝ Եգիպտոսն ամեն ինչ անում է, որպեսզի նախորդ սցենարը, երբ իսրայելական կողմը վերսկսեց ռազմական գործողությունները մարտ ամսին, չկրկնվի։ Աբդել Աթին նշել է, որ Կահիրեն շարունակում է սերտորեն համագործակցել Վաշինգթոնի հետ՝ կայուն հրադադարի, օգնության մատակարարման և պատանդների ազատ արձակման երաշխիքներ տրամադրելու համար: «Մենք չենք դադարեցնի այս ջանքերը և հույս ունենք մոտ ապագայում կոնկրետ արդյունքներ գրանցել», - հավելել է նա: