Բացառիկ արդյունք` պեղումների ժամանակ. հայտնաբերվել են նոր խաչքարեր

Գորիս քաղաքի համայնքում գտնվող Վերիշեն գյուղի վաղմիջնադարյան Սբ Հռիփսիմե եկեղեցու տարածքում այս օրերին իրականացվող հնագիտական պեղումները տվել են բացառիկ արդյունք՝ հողի տակից դուրս են բերվել նախկինում անհայտ երկու խաչքար:
Խաչքարերից մեկն արձանագիր է (ԵՍ Տ̅Ր ԱԿՈԲՍ ԿԱ[Ն]ԿՆԵՑԻ [Զ]Խ[ԱՉՍ] / ՓՐԿՈՒԹԵ̅ [ԱՆ] ՀՈԳՈՅ ԻՄՈՅ ՅԻՇԵՑԷՔ / Ի Ք̅Ս ԹՎ[ԻՆ] Ռ /1551/), մյուսը վերնամասում «Ճանկող արծվի» քիչ հանդիպող պատկերաքանդակ ունի:
Ինչպես ՄԱՄՈՒԼ.ամ-ի հետ զրույցում ներկայացրել է հնագիտական աշխատանքները ղեկավարող հնագետ Դավիթ Դավթյանը, այս խաչքարերը, հավանաբար, հողի տակ թաքցվել են խորհրդային տարիներին, որպեսզի մնան անվնաս: Ըստ հնագետի, բացառիկ է հատկապես «Ճանկող արծվի» պատկեր ունեցող խաչքարը, քանի որ այս թեմատիկայով խաչքարեր Սյունիքում շատ քիչ են հանդիպում և այս առումով, այս խաչքարը կարելի է համարել բացառիկ:
Խաչքարերն արդեն տեղադրվել են ուղղահայաց դիրքով, հետևաբար, այցելուներն արդեն կարող են տեսնել ու հիանալ միջանադարյան այս կոթողներով: