Երեքշաբթի, 01 հուլիսի, 2025 թ.
|
Ստեփանակերտում`   +21 °C

«Պատերազմը չի ավարտվի մինչև ՆԱՏՕ-ն չհեռանա». Ռյաբկով

«Պատերազմը չի ավարտվի մինչև ՆԱՏՕ-ն չհեռանա». Ռյաբկով
351
Երկուշաբթի, 09 հունիսի, 2025 թ., 18:14

«Ռուսաստանի և Ուկրաինայի միջև պատերազմը չի ավարտվի մինչև ՆԱՏՕ-ն չհեռանա»,- TASS-ին տված հարցազրույցում ասել է Ռուսաստանի փոխարտգործնախարար Սերգեյ Ռյաբկովը։

Նրա խոսքով՝ Հյուսիսատլանտյան դաշինքի ընդլայնումը դարձել է Ռուսաստանի և Միացյալ Նահանգների միջև անվտանգության հարցերում հիմնարար հակասությունների հիմնական պատճառներից մեկը։ «Առանց մեզ համար այս հիմնարար և ամենասուր խնդիրը լուծելու պարզապես անհնար է լուծել Եվրատլանտյան տարածաշրջանում առկա հակամարտությունը»,- ասել է Ռյաբկովը։

Նա հավելել է, որ ՆԱՏՕ-ի զորակազմի կրճատումը Արևելյան Եվրոպայում «կօգնի ամբողջ մայրցամաքի անվտանգությանը» և հիշեցրել է, որ Մոսկվան նմանատիպ պահանջներ արդեն ներկայացրել էր 2021 թվականի վերջին՝ Ուկրաինա ներխուժումից մի քանի ամիս առաջ։

«Վաշինգթոնին և Բրյուսելին ուղղված մեր առաջարկները ներառում էին Հյուսիսատլանտյան դաշինքի՝ դեպի արևելք չընդլայնման իրավական, իրավաբանորեն պարտավորեցնող և երկարաժամկետ երաշխիքների հրամայականը, ինչպես նաև Ռուսաստանի սահմանների մոտ հարվածային զենք չտեղակայելու պահանջները»,- հավելել է նա։

Ավելի վաղ ԱՄՆ նախագահ Դոնալդ Թրամփի հատուկ դեսպանորդ Քիթ Քելոգը հայտարարել էր, որ ԱՄՆ-ն Ռուսաստանի մտահոգությունները «ՆԱՏՕ-ի դեպի արևելք ընդլայնման» վերաբերյալ «հիմնավորված» է համարում և պատրաստ է քննարկել այս հարցը՝ որպես Ուկրաինայում պատերազմի խաղաղ կարգավորման մաս։