Կոսովոն պատրաստ է ընդունել արտաքսյալներին ու բանտարկյալներին

Կոսովոյի կառավարությունը պատրաստակամություն է հայտնել տարեկան ընդունել մինչև 50 միգրանտ, որոնք արտաքսվել են Միացյալ Նահանգներից, հաղորդում է Reuters-ը՝ հղում անելով չորեքշաբթի, հունիսի 11-ին հրապարակված հայտարարությանը։

«Կառավարությունը պատրաստակամություն է հայտնել մասնակցելու ծրագրին՝ առաջարկվող ցուցակից անհատներ ընտրելու հնարավորությամբ, եթե նրանք համապատասխանեն օրենքի գերակայության և հասարակական կարգի հետ կապված որոշակի չափանիշների»,- ասվում է հայտարարության մեջ։

Մոտ 1,6 միլիոն բնակչություն ունեցող Կոսովոն արդեն ստորագրել է համաձայնագիր՝ սկսած 2027 թվականից Դանիայից 300 բանտարկյալ ընդունելու մասին՝ հաջորդ տասնամյակի ընթացքում տրվելիք 210 միլիոն եվրոյի դիմաց։ Երկիրը նաև հետաքրքրություն է հայտնել Մեծ Բրիտանիայից արտաքսված միգրանտներ ընդունելու հարցում։

Bloomberg-ն ավելի վաղ հայտնել էր, որ Թրամփի վարչակազմը առաջարկել էր արտաքսված միգրանտներ ընդունել Բալկանյան տարածաշրջանի երկրներ, այդ թվում՝ Սերբիա։ Մինչ այդ, The Wall Street Journal-ը գրել էր, որ Մոլդովան և Կոսովոն դիտարկվում են արտաքսման հնարավոր երկրների շարքում։

Բացի այդ, Սալվադորի նախագահի հետ համաձայնագրով Միացյալ Նահանգներն սկսել է արտաքսել երրորդ երկրների քաղաքացիներին։ Այս ծրագրի շրջանակներում 250 վենեսուելացի արդեն արտաքսվել է՝ չնայած դատարանի որոշմանը։