«ՌԴ-ի ռազմական ծրագրերն ուղղված են Օդեսային, ապա՝ Մոլդովայի և Ռումինիայի սահմաններին»․ Զելենսկի

Ռուսաստանի ռազմական ծրագրերն ուղղված են Օդեսային, ապա՝ Մոլդովայի և Ռումինիայի սահմաններին։ Այս մասին Ուկրաինայի նախագահ Վլադիմիր Զելենսկին հայտարարել է Օդեսայում՝ Ուկրաինա-Հարավարևելյան Եվրոպա IV գագաթնաժողովում, հաղորդում է «Ինտերֆաքս-Ուկրաինա»-ն։

«Մենք կրկին այստեղ ենք՝ մեր գեղեցիկ քաղաքում՝ Օդեսայում։ Այս գեղեցիկ քաղաքը Ռուսաստանի թիրախն է։ Նա ցանկանում է ոչնչացնել այն, ինչպես ոչնչացրել է անթիվ քաղաքներ և գյուղեր օկուպացված տարածքներում։

Ռուսական ռազմական ծրագրերն ուղղված են այս տարածաշրջանին՝ Օդեսային, ապա՝ Մոլդովայի և Ռումինիայի սահմաններին։ Իհարկե, մեզ հիմա պաշտպանություն է պետք։ Բայց, ավելին, մեզ երկարաժամկետ երաշխիքներ են պետք, առ այն, որ դա այլևս երբեք չի կրկնվի»,- ասել է Զելենսկին։

Գագաթնաժողովի մասնակիցներին Զելենսկին կոչ է արել պատերազմից հետո անվտանգության երաշխիքները դիտարկել որպես գործնական անհրաժեշտություն։

«Հակաօդային պաշտպանությունից մինչև կիբերսպառնալիքներ, մեզ անհրաժեշտ են իրական զսպման և արագ արձագանքման հնարավորություններ։ Եկեք նայենք մեր համաձայնագրերին, մեր բանակներին, մեր ենթակառուցվածքներին և ամրապնդենք այն ամենը, ինչը պաշտպանում է մեր երկրների անվտանգությունը», նշել է Զելենսկին։