Չենք կարող անգործ մնալ, երբ Մերձավոր Արևելքում իրավիճակը գլորվում է դեպի անդունդ. Չինաստանի արտաքին գործերի նախարար

Մենք չենք կարող անգործ մնալ, երբ Մերձավոր Արևելքում իրավիճակը գլորվում է դեպի անդունդ, Չինաստանը կշարունակի կառուցողական դեր խաղալ պատերազմի ավարտի և տարածաշրջանում խաղաղության վերականգնման գործում, չորեքշաբթի օրն Օմանի արտգործնախարար Բադր բին Համադ ալ-Բուսաիդիի հետ հեռախոսազրույցում ասել է Չինաստանի արտգործնախարար Վան Յին։

«Իսրայելի գործողությունները խախտում են միջազգային իրավունքը և միջազգային հարաբերությունների նորմերը, խախտում են Իրանի ինքնիշխանությունն ու անվտանգությունը, ինչպես նաև խաթարում են տարածաշրջանային խաղաղությունն ու կայունությունը։ Հակամարտությունը նաև խաթարել է Իրանի միջուկային հարցի շուրջ դժվարությամբ ձեռք բերված միջնորդական գործընթացը, և Օմանի միջնորդական ջանքերն ապարդյուն են եղել»,- ասել է Վան Յին:
Նա նշել է, որ «ամենակարևորը հրադադարի հասնելն ու պատերազմն ավարտելն է, որքան շուտ հրադադարի հասնեն, այնքան քիչ վնաս կլինի, մենք չենք կարող անգործ մնալ, երբ տարածաշրջանում իրավիճակը գլորվում է դեպի անհայտ անդունդ»։ «Մենք հույս ունենք, որ արաբական և իսլամական երկրները կմիավորվեն և կշարունակեն ջանքեր գործադրել խաղաղությունը խթանելու և բանակցություններն առաջ մղելու համար։ Չինաստանը կշարունակի պահպանել փոխգործակցությունը և համակարգումը Օմանի և տարածաշրջանի այլ երկրների հետ և կառուցողական դեր կխաղա պատերազմի ավարտի և Մերձավոր Արևելքում խաղաղության վերականգնման խթանման գործում՝ ՄԱԿ-ի նման հարթակներում»,- հավելել է դիվանագետը։