«Չի բացառվում, որ Իսրայելը կփորձի ընդլայնել ԱՄՆ-ի ներգրավվածությունը Իրանի դեմ պատերազմում»․ Արմեն Պետրոսյան

«Ընթանում է ակտիվ հակամարտություն․․․ Ստեղծվել է մի իրավիճակ, երբ Իսրայելի և նրա հիմնական դաշնակից ԱՄՆ-ի շահերի, հետաքրքրությունների և նպատակների միջև կան լուրջ տարբերություններ։ Այսինքն՝ ԱՄՆ-ը մինչ պատերազմն էլ ավելի հակված էր դիվանագիտական ճանապարհին, բայց Իսրայելը փոխեց բոլորի պլանները, սկսեց պատերազմ, որից հետո ԱՄՆ-ը ստիպված եղավ ներքաշվել այս պատերազմական գործողությունների մեջ, քանի որ Իսրայելն իր ռեսուրսներով չէր կարողանում լուծել հռչակված նպատակները․ դա Իրանի միջուկային ներուժի և հրթիռային ենթակառուցվածքների ոչնչացումն է»,- այս մասին «Նյուզ»-ի հետ զրույցում նշեց տարածաշրջանային հարցերով փորձագետ Արմեն Պետրոսյանը՝ հավելելով, որ, իր գնահատմամբ, Իսրայելի նպատակներից է նաև Իրանում վարչակարգի փոփոխության հասնելը։

«Կանխատեսելի է, որ ԱՄՆ-ը սրանով կփորձի սահմանափակել իր ներգրավվածությունը, բայց չի բացառվում, որ Իսրայելի կողմից նոր փորձեր կարվեն՝ ԱՄՆ-ի ներգրավվածությունն այս պատերազմում շատ ավելի ընդլայնելու համար»,- ընդգծեց Պետրոսյանը։