«Կիևին Patriot հրթիռների մատակարարումը դադարեցնելու ԱՄՆ որոշումը կարող է անդառնալի հետևանքներ ունենալ»․ #WP

Ռուսաստանի և Ուկրաինայի միջև հակամարտությունը հասել է շրջադարձային կետի՝ Կիևին Patriot հրթիռների մատակարարումը դադարեցնելու ԱՄՆ որոշման պատճառով: Այս մասին հոդված է հրապարակել The Washington Post-ը։

Հրապարակման համաձայն, չնայած եվրոպական և տեղական սարքավորումներն արդյունավետ են եղել ռուսական Shahed և հեռահար թևավոր հրթիռների ոչնչացման գործում, Patriot-ը բալիստիկ հրթիռներից պաշտպանվելու միակ միջոցն է։

Հեղինակները նշում են, որ նախկին նախագահ Ջո Բայդենի խոստացած մատակարարումների դադարը տեղի է ունեցել Ռուսաստանի ռազմական ակտիվության աճի ֆոնին։ Նրանց կարծիքով՝ որոշումը «կարող է ունենալ ավերիչ և անդառնալի հետևանքներ»։

Կիևին անհրաժեշտ էր Միացյալ Նահանգների ուժեղ աջակցությունը՝ հակամարտությունում հաղթելու համար, բայց հիմա «դա հարցականի տակ է», - ասվում է հոդվածում։ Հեղինակների կարծիքով, եթե Ուկրաինան պարտվի, դա կլինի «Ամերիկայի անպատասխանատվության արդյունքը»։

Փենթագոնը դադարեցրել է Ուկրաինային որոշ զենիթային հրթիռների և այլ ճշգրիտ կառավարվող զինամթերքի մատակարարումը՝ ԱՄՆ զենքի պաշարների չափազանց փոքր լինելու մտավախությունների պատճառով, գրել են Politico-ն և NBC-ն։

Ավելի վաղ Պետդեպարտամենտը հայտարարել է, որ դադարեցումը վերաբերում է միայն որոշ մատակարարումների և չի նշանակում Կիևին տրամադրվող ռազմական օգնության լիակատար դադարեցում։