«Ռուսական ԱԹՍ-ներն այրել են ավելի քան 2 միլիարդ դոլար արժողությամբ թշնամական տեխնիկա». Պուտին

Որքան երկար արևմտյան քաղաքական գործիչները «շարունակեն թշնամական գործողություններ իրականացնել» Ռուսաստանի դեմ, «այնքան ավելի վատ կլինի նրանց համար»,- «Ժողովրդական ճակատի» ֆորումում ասել է Ռուսաստանի նախագահ Վլադիմիր Պուտինը։

Նրա խոսքով՝ «ռուսական անօդաչու թռչող սարքերը այրել են ավելի քան 2 միլիարդ դոլար արժողությամբ թշնամական տեխնիկա»։ «Ուկրաինա զենք ուղարկող արևմտյան կառավարությունները պետք է մտածեն, թե ինչի վրա են ծախսում ժողովրդի փողերը»,- հավելել է նա։

Պուտինն Ուկրաինա ներխուժման գլխավոր նպատակն անվանել է «Ռուսաստանի անվտանգ և խաղաղ ապագա»-ն, «դրա համար տղաները կռվում են ռազմաճակատում»։

Նա ասել է, որ «առանց չափազանցության, ամբողջ Ռուսաստանը մասնակցում է ռազմաճակատի աջակցությանը»։ Պուտինի խոսքով՝ «ռուս կուլիբինները երբեմն ռազմաճակատի կարիքների համար մտածում են այնպիսի բաներ, որոնք որակով գերազանցում են ՆԱՏՕ-ի երկրներից եկող տեխնիկային»։

Պուտինը Ռուսաստանի ռազմածովային ուժերի փոխղեկավար Միխայիլ Գուդկովին, որը վերջերս սպանվել էր ուկրաինական բանակի կողմից, անվանել է «իսկական ռուս սպա, որը մինչև վերջ կատարել է իր պարտքը Ռուսաստանի նկատմամբ»՝ խնդրելով մեկ րոպե լռությամբ հարգել «հերոսի» հիշատակը։

«Բոլոր ռուսների սրտերը առաջնագծում գտնվող տղաների և նրանց սիրելիների հետ են։ Ռուսները միասին հսկայական, անխորտակելի ուժ են իրենց արդարությամբ և միասնությամբ»։