Հունաստանի ափային ծառայությունը հրազեն է կիրառել ադրբեջանցիների մոտորանավակը կանգնեցնելու նպատակով

Հունաստանի ափային պահպանությունը ձերբակալել է Թուրքիայից Հունաստան անօրինական միգրանտներ տեղափոխող ևս մեկ մոտորանավակ։ Նավակը պատկանում էր և շահագործվում էր Ադրբեջանի քաղաքացիների կողմից։ Հունական աղբյուրների համաձայն, այս անգամ մաքսանենգներին կանգնեցնելու համար օգտագործվել է հրազեն։

Հաղորդվում է, որ երկուշաբթի առավոտյան Լեսբոս կղզու մոտ պլանային պարեկության ժամանակ Հունաստանի ափային պահպանության նավը նկատել է մեծ արագությամբ դեպի ափ շարժվող նավակ, որը բազմաթիվ ուղևորներ էր տեղափոխել։ Մեկ այլ պարեկային նավ անմիջապես կանչվել է տարածք, որը տեսնելուց հետո նավը մեծացրել է արագությունը՝ կատարելով վտանգավոր մանևրներ։
Հունական նավերը սկսել են հետապնդել անկոչ հյուրին, սակայն նավի անձնակազմը անտեսել է լուսային և ձայնային նախազգուշացումները և բախվել է ափային պահպանության նավին։ Այդ պահին հունական նավի անձնակազմը կրակ է բացել և կարողացել է կանգնեցնել նավակը։ Այնուհետև ափային պահպանության զինվորները բարձրացել են նավակ, որտեղ նավավարներից մեկը՝ Ադրբեջանի 22-ամյա քաղաքացի, դիմադրություն է ցույց տվել։ Ադրբեջանցին արագորեն զինաթափվել է. նրա մոտ հայտնաբերվել է դանակ։ Նավի երկրորդ վարողը՝ Ադրբեջանի 23-ամյա քաղաքացի, նույնպես ձերբակալվել է։

Նավի վրա գտնվող 28 օտարերկրացիները տեղափոխվել են միգրանտների ժամանակավոր կալանավայր։

Նշենք, որ սա Թուրքիայից Հունաստան անօրինական միգրանտներ տեղափոխող Ադրբեջանի քաղաքացիների ձերբակալման առաջին դեպքը չէ։ Նախկինում Հունաստանի ափային պահպանությունը բազմիցս ձերբակալել է այն նավակների անձնակազմին, որոնցում գտնվում էին ադրբեջանցիներ։

Հունական լրատվամիջոցները գրում են, որ Թուրքիայում գործում են կազմակերպված հանցավոր խմբեր, որոնք զբաղվում են անօրինական միգրանտներին մոտորանավակներով Հունաստանի ափեր տեղափոխելով։ Այս խմբերը նաև ցամաքային ճանապարհով անօրինական միգրանտներին տեղափոխում են Բալկաններով Եվրոպա։