Ճգնաժամ՝ Նիկոլ Փաշինյանի խոստացած ապագայի շուրջ․ «Ժողովուրդ»

«Ժողովուրդ» օրաթերթը գրում է. «Երեկ՝ ուրբաթ օրը, ՀՀ վարչապետ Նիկոլ Փաշինյանը հյուրընկալել է Ամերիկյան միջազգային հանրապետական ինստիտուտի (IRI) պատվիրակությանը։ Ինչպես հայտնում են «Ժողովուրդ» օրաթերթի վստահելի աղբյուրները ՀՀ Կառավարությունից, IRI-ի ներկայացուցիչները վարչապետին են ներկայացրել իրենց կողմից անցկացված վերջին սոցիոլոգիական հարցման արդյունքները։
Նկատենք, որ հարցումների արդյունքները սովորաբար ներկայացվում են դռնփակ ձևաչափով՝ իշխանություններին և խորհրդարանական ուժերին:
«Ժողովուրդ» օրաթերթի իրազեկ աղբյուրները փոխանցում են, որ այս անգամ Փաշինյանի համար արդյունքները տհաճ անակնկալ են եղել. նրա վարկանիշը զգալի անկում է ապրել՝ նախորդ հարցումներից հետո գրանցելով իր ամենացածր ցուցանիշները։

Խոսքը ոչ այնքան այլ քաղաքական ուժերի վարկանիշի աճի, որքան հասարակական հիասթափության խորացման մասին է։ Ըստ «Ժողովուրդ»-ի տեղեկությունների՝ հատկապես մտահոգիչ է երիտասարդության շրջանում արձանագրված պատկերը․ 70-75 տոկոսը մերժում կամ անտարբերություն է ցուցաբերում քաղաքական գործընթացների նկատմամբ։ Նրանք չեն վստահում ոչ մի քաղաքական ուժի, չեն հավատում խոստումներին և չեն պատկերացնում իրենց ապագան Փաշինյանի իշխանության օրերին. չեն պատրաստվում մասնակցել 2026 թվականին կայանալիք ընտրություններին:

Այս խորացող անտարբերությունն ու մարգինալացումը խոսում են համակարգային վստահության ճգնաժամի մասին»։

Մանրամասները՝ թերթի համարում: