«Խարկովի ուղղությամբ ռուսական զորքերն ամեն օր կորցնում են մոտ 100 զինվոր` սպանված և վիրավորված». Պավել Շամշին

Խարկովի ուղղությամբ ռուսական զորքերն ամեն օր կորցնում են մոտ 100 զինվոր՝ սպանված և վիրավորված, այսինքն՝ մի ամբողջ վաշտ, հեռուստամարաթոնի եթերում ասել է «Խարկով» օպերատիվ-մարտավարական խմբի խոսնակ Պավել Շամշինը։

«Միայն մեր ուղղությամբ նրանք (ռուսները) ամեն օր կորցնում են մոտավորապես 100 սպանված և վիրավորված մարդ՝ սա իրականում մի ամբողջ վաշտ է, և մեկ շաբաթում սա արդեն ավելին է, քան մեկ գումարտակ, բայց դա նրանց չի կանգնեցնում»,- ասել է Շամշինը։

Նրա խոսքով՝ ռուսները շարունակում են ակտիվ գրոհային գործողությունները։

«Նույնիսկ ռուսական բանակը վաղ թե ուշ կբախվի այնպիսի հասկացության, ինչպիսին է հյուծումը, և երբ դա տեղի ունենա, հավանական է, որ ռուսներին կարող է անակնկալ սպասվել։ Հուսով եմ՝ շատ տհաճ»,- հավելել է խոսնակը։

Ռուսները փորձում են հարձակվել տարբեր վայրերում, և երկու շաբաթ առաջ նրանք ակտիվ գործողություններ են սկսել Բոլշոյ Բուրլուկ գյուղից հյուսիս-արևելք գտնվող Մելովոե գյուղի տարածքում։

«Այնտեղ նրանք իսկապես հատեցին պետական սահմանը և փորձեցին շարժվել Ամբարնոյե գյուղի ուղղությամբ, բայց կանգնեցվեցին, ապա նրանք փոխեցին իրենց շարժման վեկտորը և փորձեցին առաջ շարժվել Խատնեե գյուղի ուղղությամբ, բայց նույնպես կանգնեցվեցին։ Նրանք փորձում են ձգել մեր պաշտպանությունը՝ փնտրելով թույլ կետեր, և եթե կարծեն, որ ինչ-որ տեղ կարող են գտնել նման թույլ կետ, ապա կկուտակեն իրենց հետևակային ուժերը նման վայրերում, որոնք կօգտագործեն հաջողություններ զարգացնելու համար»,- ասել է խոսնակը։