«Գազայում սովը հասել է աղետալի մակարդակի»․ ՀԱՄԱՍ

Գազայի հատվածում սովը հասել է աղետալի մակարդակի՝ անկլավի շարունակական շրջափակման պատճառով։ Այս մասին ասվում է ՀԱՄԱՍ-ի հայտարարության մեջ, որը տեղադրվել է արմատական շարժման Telegram ալիքում։

«Գազայում սովը հասել է աղետալի մակարդակի՝ սիոնիստական բանակի կողմից շարունակական խեղդող շրջափակման պատճառով։ Ֆաշիստական օկուպացիոն կառավարության կողմից սովի օգտագործումը որպես զենք և Գազայի բնակիչներին կենսական անհրաժեշտություններից զրկելը որպես ցեղասպանության գործիք, որը շարունակվում է ավելի քան 21 ամիս, ժամանակակից պատմության ամենածանր հանցագործություններից մեկն է անմեղ երեխաների և խաղաղ բնակիչների դեմ», - ասվում է հայտարարության մեջ։

ՀԱՄԱՍ-ը կոչ է արել միջազգային հանրությանը անհապաղ միջոցներ ձեռնարկել Իսրայելի շրջափակումը վերացնելու համար։

«Մենք պահանջում ենք արաբ-իսլամական երկրներից և ՄԱԿ-ից անհապաղ միջոցներ ձեռնարկել՝ շրջափակումը վերացնելու, սննդի և մարդասիրական օգնության անարգել մուտքն ապահովելու և կոտորածները, ցեղասպանությունն ու սովը դադարեցնելու համար», - ընդգծել է պաղեստինյան շարժումը։

Ինչպես շաբաթվա սկզբին հաղորդել էր Կատարի «Al Jazeera»-ն, Իսրայելի շրջափակումը Գազայի 2.1 միլիոն մարդու սովի եզրին է հասցրել։