Բողոքի ցույցերի ֆոնին Զելենսկին վերականգնում է հակակոռուպցիոն մարմինների անկախությունը

Ուկրաինայում ընթացող բողոքի ցույցերի ֆոնին նախագահ Վլադիմիր Զելենսկին Ռադայի քննարկմանն է ներկայացրել հակակոռուպցիոն մարմինների մասին նոր օրինագիծ՝ խոստանալով, որ փաստաթուղթը կապահովի Ուկրաինայի ազգային կոռուպցիայի դեմ պայքարի բյուրոյի և Կոռուպցիայի դեմ պայքարի մասնագիտացված դատախազության անկախությունը։ Երկու գործակալություններն էլ արդեն հայտարարել են, որ օրինագիծը կվերականգնի իրենց անկախության երաշխիքները։

«Ես համաձայնության եմ եկել օրինագծի տեքստի շուրջ, որը երաշխավորում է Ուկրաինայում իրավապահ համակարգի իրական ամրապնդումը, կոռուպցիայի դեմ պայքարի մարմինների անկախությունը, ինչպես նաև իրավապահ համակարգի հուսալի պաշտպանությունը ռուսական ցանկացած ազդեցությունից կամ միջամտությունից։ Տեքստը հավասարակշռված է», - Թելեգրամում գրել է Ուկրաինայի նախագահը։

«Կարևոր է, որ մենք հարգենք բոլոր ուկրաինացիների դիրքորոշումը»,- նշել է Զելենսկին։
Ավելի վաղ Զելենսկին հակակոռուպցիոն մարմինների վերաբերյալ վիճահարույց օրենքի նախագիծ էր ստորագրել, որով սահմանափակվում էր նշված կառույցների անկախությունը, ինչը հասարակության շրջանում բողոքի ալիք էր բարձրացրել։