«Սա բոլոր իշխանությունների արձանն է». Գևորգ Թոսունյան

Լրագրող Գևորգ Թոսունյանի ֆեյսբուքյան գրառումը․ «Սրանից լավ արձան տեսած չեք լինի, սա բոլոր իշխանությունների արձանն է:
Ծաղկունք գյուղում՝ լքված սովետական պատվանդանի մոտ, մի երեխա պահմտոցի է խաղում։ Հայաստանով տարբեր հատվածներում այս պատվանդաններից կտեսնեք։ Ժամանակին դրանց վրա կանգնեցված էին այն ղեկավարների արձանները, որոնք իրենց ու իրենց իշխանությունը հավերժ էին համարում։
Այսօր արձանները չկան, իսկ դատարկ պատվանդանները մնացել են՝ որպես ներկաների համար լուռ հիշեցում, որ անմահ ոչինչ չկա։
Այն, ինչը կառուցվել էր առաջնորդի հավերժացման համար, այսօր ծառայում է երեխայի խաղին։ Իշխանությունները գալիս ու գնում են, գաղափարախոսությունները՝ մերժվում, մեռնում կամ մոռացվում, բայց կյանքը շարունակվում է՝ նույնիսկ ամենահզոր, թվում է՝ անմահ կայսրությունների փլատակների վրա»։