«12-օրյա պատերազմն «իր սկիզբն է առնում Ադրբեջանից»». իրանցի փորձագետ

254

Այսօր, 19:39

Իրանցի աշխարհաքաղաքական հարցերով փորձագետ և պրոֆեսոր Աբդուրրեզա Ֆարաջիրադն անդրադարձել է Զանգեզուրի միջանցքի թեմային և Իրան-Իսրայել12-օրյա պատերազմի պատճառները կապել Ադրբեջանի հետ: Իրան-Եվրոպա միջուկային բանակցությունների համատեքստում նա ասել է, որ տարածաշրջանում ռազմական լարվածությունը, այդ թվում՝ 12-օրյա պատերազմը, «իր սկիզբն է առնում Ադրբեջանից»:

Փորձագետի խոսքով՝ «Զանգեզուրի միջանցքի» նախագիծը Միացյալ Նահանգներին և Իսրայելին «մուտք է ապահովում դեպի Իրան»: Նա նախագիծը որակել է որպես նոր հակամարտությունների հիմք և հավելել, որ «Ադրբեջանն օգտագործում է իրավիճակն իր օգտին»:

Ֆարաջիրադն ընդգծել է նաև, որ Իրանը պետք է սերտ կապեր հաստատի Հայաստանի հետ, քանի որ Ադրբեջանն «Իրանի բարեկամը չէ»:

Այս հայտարարությունները հակասում են Ադրբեջանի բազմիցս հնչեցրած դիրքորոշմանը, գրում է իրանական Fararu լրատվական գործակալությունը:

Բաքուն ընդգծում է, որ Զանգեզուրի միջանցքը նպատակ ունի ամրապնդել տարածաշրջանային տնտեսական համագործակցությունն ու տրանսպորտային կապերը և ուղղված չէ որևէ երկրի դեմ, նշում է գործակալությունը: