Կամբոջան և Թայլանդը համաձայնության են եկել հրադադարի շուրջ

621

Երկուշաբթի, 28 հուլիսի, 2025 թ., 14:54

Կամբոջայի վարչապետ Հուն Մանեթը և Թայլանդի վարչապետի պաշտոնակատար Ֆումտհամ Վեչայաչայը համաձայնության են եկել անհապաղ հրադադարի շուրջ, հայտարարել է Մալայզիայի վարչապետ Անվար Իբրահիմը, որը բանակցություններում միջնորդի դեր էր ստանձնել: Համաձայնագիրն ուժի մեջ կմտնի կեսգիշերից, հաղորդում է BBC-ն։ «Սա կարևոր քայլ է դեպի լարվածության թուլացում և խաղաղության ու անվտանգության վերականգնում»,- ասել է Անվարը: Մալայզիայի վարչապետի խոսքով՝ երկու երկրների ռազմական ներկայացուցիչները ոչ պաշտոնական հանդիպում կանցկացնեն հուլիսի 29-ին։

Հուն Մանեթը բանակցություններն անվանել է «շատ լավ հանդիպում» և ասել, որ հույս ունի «անմիջապես» դադարեցնել մարտական գործողությունները: Նա շնորհակալություն է հայտնել Մալայզիայի առաջնորդին, ԱՄՆ նախագահ Դոնալդ Թրամփին և Չինաստանի կառավարությանը՝ հակամարտության կարգավորման գործում իրենց միջնորդության համար:

Ավելի վաղ ԱՄՆ նախագահ Դոնալդ Թրամփը հայտարարել էր, որ Փնոմպենը և Բանգկոկը երկխոսության պատրաստակամություն են հայտնել՝ իր հեռախոսազրույցներից հետո։