«Մեծ Բրիտանիան կարող է ճանաչել Պաղեստինը՝ մինչև 2029 թվականը»․ Ռեյնոլդս

254

Այսօր, 16:33

Միացյալ Թագավորությունը կարող է ճանաչել Պաղեստինը մինչև 2029 թվականը, այսինքն՝ մինչև ներկայիս խորհրդարանի ժամկետի ավարտը։ Այս մասին հայտարարել է Մեծ Բրիտանիայի բիզնեսի և առևտրի նախարար Ջոնաթան Ռեյնոլդսը՝ Sky News հեռուստաալիքի եթերում։

Վարչապետ Քեյր Սթարմերը նախկինում հայտնել էր, որ Լոնդոնը կճանաչի Պաղեստինը «պատեհ ժամանակին»։

Հուլիսի 24-ին Ֆրանսիայի նախագահ Էմանուել Մակրոնը գրել էր, որ Փարիզը կճանաչի Պաղեստին պետությունը՝ սեպտեմբերին ՄԱԿ-ի Գլխավոր ասամբլեայի նստաշրջանում։ Ի պատասխան՝ Իսրայելը հայտարարել էր, որ նման քայլը կլինի «ՀԱՄԱՍ-ի մարդասպաններին և բռնարարներին պարգևատրում և աջակցություն»։