Թրամփը համաձայնել է 90 օրով երկարաձգել գործող առևտրային համաձայնագրերը Մեքսիկայի հետ

Մեքսիկայի նախագահ Կլաուդիա Շեյնբաումի հետ հեռախոսազրույցի ժամանակ ԱՄՆ-ի նախագահ Դոնալդ Թրամփը համաձայնել է 90 օրով երկարաձգել գործող առևտրային համաձայնագրերը և շարունակել առևտրային բանակցությունները, հաղորդում է ՏԱՍՍ-ը։

«Մենք համաձայնել ենք 90 օրով երկարաձգել ճիշտ նույն համաձայնագիրը, ինչ նախորդ կարճ ժամանակահատվածում, այն է՝ Մեքսիկան կշարունակի վճարել 25% մաքսատուրք ֆենտանիլի, 25%՝ ավտոմեքենաների և 50%՝ պողպատի, ալյումինի և պղնձի համար։ Բացի այդ, Մեքսիկան համաձայնել է անհապաղ վերացնել իր բազմաթիվ ոչ սակագնային առևտրային խոչընդոտները»,- գրել է Թրամփը Truth Social սոցիալական ցանցում։

Ամերիկացի առաջնորդը նշել է, որ հաջորդ 90 օրվա ընթացքում կողմերը կշարունակեն առևտրային համաձայնագրի շուրջ բանակցությունները, ինչպես նաև հաստատել է Միացյալ Նահանգների և Մեքսիկայի մտադրությունը՝ համագործակցել թմրանյութերի մաքսանենգության և անօրինական միգրացիայի դեմ պայքարում։

Իր հերթին Շեյնբաումը ԱՄՆ նախագահի հետ զրույցը բնութագրել է որպես «շատ լավ»։ Նրա խոսքով՝ կողմերին հաջողվել է խուսափել օգոստոսի 1-ին նախատեսված մաքսատուրքերի բարձրացումից և համաձայնության են եկել 90-օրյա ժամկետի շուրջ՝ երկխոսության վրա հիմնված երկարաժամկետ համաձայնագիր մշակելու համար։

Հուլիսի 12-ին նախագահ Թրամփը Truth Social-ում հրապարակեց Շեյնբաումին ուղղված նամակ, որում նա հայտարարեց օգոստոսի 1-ից ԱՄՆ առաքվող մեքսիկական ապրանքների վրա 30 տոկոս մաքսատուրքի սահմանման մասին: Նրա խոսքով՝ Մեքսիկան բավարար միջոցներ չի ձեռնարկել թմրամիջոցների կարտելների տարածման և ԱՄՆ ֆենտանիլի մաքսանենգության դեմ պայքարելու համար: