Վրացի սահմանապահները տարհանվել են «Կազբեգի» անցակետից

Վրաստանում տարհանվել են «Կազբեգի» (Դարիալի) անցակետի աշխատակիցները, ինչպես նաև Ռուսաստանի հետ սահմանի մոտ գտնվող մասնավոր ընկերությունների աշխատակիցները, հաղորդում է Վրաստանի ՆԳՆ մամուլի ծառայությունը։
Տեղական լրատվամիջոցները հաղորդում են, որ Վրաստանի և Ռուսաստանի միջև սահմանին գտնվող Վերին Լարսի սահմանային անցակետով երթևեկությունը լիովին դադարեցվել է բոլոր տեսակի տրանսպորտային միջոցների համար՝ սելավային հոսքերի պատճառով։

«Ստացվել է Թերեք գետի ջրի մակարդակի բարձրացման մասին ազդանշան։ Անվտանգության նկատառումներից ելնելով՝ սահմանային ոստիկանության աշխատակիցները, մաքսային աշխատակիցները և մոտակայքում աշխատող բոլոր անձինք տարհանվել են»,- նշել է Վրաստանի ՆԳՆ-ն։

Գերատեսչությունը պարզաբանել է, որ սելավային հոսանքի հետևանքով ոչ ոք չի տուժել։ ՆԳՆ աշխատակիցներն աշխատում են դեպքի վայրում՝ վերահսկելով իրավիճակը։