Հարավային Աֆրիկան վարժանքներ կանցկացնի Ռուսաստանի և Չինաստանի հետ

Հարավային Աֆրիկան, Ռուսաստանը և Չինաստանը այս տարվա նոյեմբերին Աֆրիկայի ափերի մոտ կանցկացնեն համատեղ ծովային վարժանքներ՝ «Մոսի 3» (Ծուխ 3) կոդային անվամբ: Այս մասին հաղորդում է DefenceWeb լրատվական պորտալը:
Վարժանքները կանցկացվեն Ատլանտյան օվկիանոսում՝ ընդունող երկրի՝ Հարավային Աֆրիկայի ափերի մոտ: Վարժանքները կգլխավորի Չինաստանը: Թե որ նավերը կմասնակցեն դրանց, դեռևս չի հրապարակվել:

Հունիսին Հարավային Աֆրիկայում կայացած նախապատրաստական հանդիպման ժամանակ «Մոսի 3»-ի մասնակիցների համար դրվել են հետևյալ խնդիրները՝ երեք երկրների միջև ռազմավարական հարաբերությունների ամրապնդում և զարգացում, ծովային համագործակցության ամրապնդում, ծովում խաղաղության և կայունության պահպանում:

Հիշեցնենք, որ Հարավային Աֆրիկայի, Ռուսաստանի և Չինաստանի առաջին համատեղ ծովային վարժանքները՝ «Մոսի»-ն, տեղի են ունեցել 2019 թվականի նոյեմբերին՝ Ատլանտյան օվկիանոսում՝ Քեյփթաունի մոտ: Երկրորդը՝ 2023 թվականի փետրվարին՝ Հնդկական օվկիանոսում՝ Դուրբան քաղաքից հյուսիս: