«ԱՄՆ-ն որտեղ «խաղաղություն ու ժողովրդավարություն» է բերել, այնտեղ կտեսնեք միայն արյուն ու անկայունություն»․ Սամվել Հակոբյան

Երևանի ավագանու «Մայր Հայաստան» խմբակցության անդամ Սամվել Հակոբյանի ֆեյսբուքյան գրառումը․ «Կցանկանայի, որ մենք սխալվեինք, իսկ դուք՝ ճիշտ լինեիք։
Կցանկանայի, որ ամերիկյան ներգրավվածությունից ոգևորվողները իրավացի լինեին, իսկ խոստացված «խաղաղությունը»՝ իրական։ Բայց փաստերը այլ բան են ասում։ Եթե նայենք այն երկրներին, ուր ԱՄՆ-ը «խաղաղություն ու ժողովրդավարություն» է բերել, կտեսնենք միայն արյուն, քայքայում ու անկայունություն։
Եթե ես սխալվում եմ, ուրեմն Նիկոլը դավաճան չէ։ Ուրեմն Ալենը սուտասան չէ։ Ուրեմն միջին ՔՊ-ականը պարզապես մի կիսագրագետ, ամբիցիոզ մի չտես չէ, ով որևէ ազգային կամ հոգևոր արժեք չունի։
Իսկ եթե ես չեմ սխալվում, ապա մենք կանգնած ենք մեր պետականության ինքնասպանության եզրին՝ դառնալով Թուրանի ծրագրի իրագործման գործիք՝ դավաճանելով մեր միակ իրական դաշնակիցներին։ ՌԴ-ն և ԻԻՀ-ն այն եզակի պետություններն են, որոնց համար Հայաստանի ուժեղ, կայուն և ինքնիշխան լինելը պարզապես հարաբերությունների հարց չէ՝ այլ փոխադարձ շահերի և համատեղ անվտանգության բանալի:
Եվ մենք՝ տարածաշրջանի փոքրագույն պետությունը, այսօր մեր ռազծավարական դաշնակիցներին ասում ենք՝ մենք ձեզ չենք ընտրում, մենք ընտրում ենք ձեր մրցակիցներին։
Եվ ամենավշտալին այն է, որ այդ ընտրության գինը մենք ենք վճարելու։ Մեծերը միշտ գտնում են համաձայնության եզրեր՝ սեղանի շուրջ, շահերի լեզվով։ Փոքրերն են, որ կարող են ուղղակի վերանալ թե այդ սեղանից, թե առհասարակ աշխարհի քարտեզից»։