«Ոչ ոք չի կարող կանգնեցնել մեզ գերտերություն դառնալու ճանապարհին». Հնդկաստանի ՊՆ

Հնդկաստանը զարգանում է այնպիսի տեմպերով, որ ոչ մի համաշխարհային տերություն չի կարող կանգնեցնել նրան գերտերություն դառնալու ճանապարհին, Մադհյա Պրադեշում ելույթ ունենալիս ասել է Հնդկաստանի պաշտպանության նախարար Ռաջնաթ Սինգհը։

«Որոշ մարդիկ չեն կարողանում հաշտվել Հնդկաստանի առաջընթացի հետ։ Նրանք այդքան էլ դրական չեն տրամադրված դրա նկատմամբ։ Ջանքեր են գործադրվում, որպեսզի Հնդկաստանում արտադրված ապրանքներն ավելի թանկ լինեն, երբ դրանք արտահանվեն այլ երկրներ»,- ասել է Սինգհն ԱՄՆ նախագահ Դոնալդ Թրամփի կողմից հնդկական ապրանքների վրա մաքսատուրքերը բարձրացնելու որոշումից հետո։ Հնդիկ նախարարն ուղղակիորեն չի շեշտել Թրամփի անունը, բայց իր ելույթում նշել է, որ «բոլորի ղեկավարը» չի հասկանում, որ Հնդկաստանն արագորեն առաջ է ընթանում:

Հարավասիական հանրապետության պաշտպանության նախարարը հիշեցրել է, որ Հնդկաստանի պաշտպանական արտահանումը տարեկան գերազանցել է 240 միլիարդ հնդկական ռուփին (ավելի քան 2.7 միլիարդ դոլար)։ «Սա ինքնին ռեկորդ է։ Սա Հնդկաստանի ուժն է, սա նոր Հնդկաստանի նոր պաշտպանական ոլորտն է, և արտահանումն անընդհատ աճում է», - ընդգծել է Սինգհը։

Ամերիկյան վարչակազմը Հնդկաստանի վրա սահմանել է 25% լրացուցիչ մաքսատուրքեր՝ կապված ռուսական նավթի գնման հետ։ Հնդկական ապրանքների վրա 25% մաքսատուրք սահմանելու՝ ԱՄՆ-ի՝ նախկինում ընդունված որոշման հետ մեկտեղ, Հարավային Ասիայի հանրապետության համար մաքսատուրքն այժմ կկազմի 50%։

Թրամփը նախկինում հայտարարել էր, որ Հնդկաստանն «իր ռազմական տեխնիկայի մեծ մասը միշտ գնել է Ռուսաստանից» և «Չինաստանի հետ միասին ռուսական էներգետիկ ռեսուրսների ամենամեծ գնորդն է»։ Հնդկաստանի արտաքին գործերի նախարարությունն անհիմն է անվանել ԱՄՆ-ի և ԵՄ-ի կողմից ռուսական նավթի ներմուծման վերաբերյալ հարձակումները, քանի որ արևմտյան երկրները նախկինում խրախուսում էին նման առևտուրը և իրենք շարունակում են ապրանքներ և ծառայություններ գնել Ռուսաստանի Դաշնությունից։