«Ուկրաինան պատրաստ է քննարկել տարածքների հարցեր, բայց ռուսական օկուպացիայի ճանաչումը քննարկման առարկա չէ». Ֆրիդրիխ Մերց

Ուկրաինան պատրաստ է քննարկել տարածքների հարցը, սակայն օկուպացված տարածքների նկատմամբ Ռուսաստանի ինքնիշխանության իրավական ճանաչման մասին խոսք չկա։ Այս մասին հայտարարել է Գերմանիայի կանցլեր Ֆրիդրիխ Մերցն Ուկրաինայի նախագահ Վլադիմիր Զելենսկու հետ համատեղ մամուլի ասուլիսում։

Այսպիսով, նա համառոտակի ներկայացրել է ԱՄՆ-ի նախագահ Դոնալդ Թրամփի հետ հեռախոսազրույցի բովանդակությունը, որին միացել են նաև այլ եվրոպացի առաջնորդներ։ Մերցի խոսքով՝ Թրամփին բացատրել են, որ նախ պետք է հրադադար հաստատվի ռազմաճակատում, և միայն դրանից հետո կողմերը կփորձեն կնքել պատերազմը դադարեցնելու երկարաժամկետ համաձայնագիր։

«Ուկրաինան պատրաստ է քննարկելու տարածքային հարցեր, բայց մեկնարկային կետը պետք է լինի առաջնագիծը։ Եվ ռուսական օկուպացիայի ճանաչումը քննարկման առարկա չէ»,- ասել է Մերցը։
Կանցլերի խոսքով՝ Թրամփին բացատրվել են նաև մի շարք այլ դիրքորոշումներ, որոնք Ուկրաինան և Եվրոպան ընդունում են։ Մասնավորապես, նշվում է, որ Կիևը պետք է լինի հաջորդ բանակցային սեղանի շուրջ, եթե գործընթացը շարունակվի Ալյասկայում հանդիպումից հետո։ Մերցը նաև նշել է, որ ուկրաինական բանակը պետք է պահպանի պետությունը պաշտպանելու կարողությունը, բայց նա նաև շեշտել է Ուկրաինայի համար «կենսունակ երկարաժամկետ անվտանգության երաշխիքների» անհրաժեշտությունը։