«Քննարկել ենք անվտանգության երաշխիքներն ու ԱԹՍ-ների արտադրության մեջ ներդրումները»․ Զելենսկի

Ուկրաինայի նախագահ Վլադիմիր Զելենսկին և Մեծ Բրիտանիայի վարչապետ Քեյր Սթարմերը քննարկել են անվտանգության երաշխիքների թեման։ Այս մասին հայտնել է Զելենսկին։

«Մենք մանրամասն քննարկեցինք անվտանգության երաշխիքները, որոնք կարող են աշխարհը դարձնել իսկապես կայուն, եթե ԱՄՆ-ն կարողանա ստիպել Ռուսաստանին դադարեցնել սպանությունները և անցնել բովանդակային դիվանագիտության: Կարևոր է, որ մենք «կամեցողների կոալիցիայի» շրջանակներում կարողանանք համատեղ հասնել աշխատանքի արդյունավետ ձևաչափերի՝ անվտանգության ոլորտում»,- գրել է Զելենսկին։

«Օրակարգի առանձին և կարևոր կետ էր անօդաչու թռչող սարքերի արտադրության մեջ ներդրումները: Մենք ունենք զգալի ներուժ արտադրության ծավալները մեծացնելու համար, և դա պահանջում է անհապաղ ֆինանսավորում: ԱԹՍ-ները կարևոր դեր են խաղում առաջնագծում: Ուկրաինայի հնարավորությունները դրանց արտադրության համար բացառիկ են, ուստի այս արտադրության մեջ ներդրումները կարող են իսկապես ազդել իրավիճակի վրա ռազմավարական մակարդակում»,- հավելել է Ուկրաինայի նախագահը: