«Ադրբեջանը չի լուծարում «Արևմտյան Ադրբեջան» զավթողական կազմակերպությունները». Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը․ ««Արևմտյան Ադրբեջան» զավթողական կոնցեպտի հետ կապված կազմակերպությունների չեղարկման լուրի կեղծ լինելը փաստելու համար բերեմ մեկ ակնառու օրինակ։ Օգոստոսի 12-ին վաշինգթոնյան հանդիպումից հետո «Արևմտյան Ադրբեջանի համայնքի» անդամները նամակ են հղել Ալիևին, որը տեղակայված է հենց իրենց նախագահականի կայքում: Ընդ որում, ռուսերեն ու անգլերեն չեն թարգմանել, որ մարդ չիմանա:
Նամակում կարճ ասած գրված էր հետևյալը․ «Արևմտյան Ադրբեջանի համայնքի անդամների անունից Ձեզ ողջ սրտով շնորհավորում ենք ԱՄՆ կատարած այցի ընթացքում ձեռք բերած մեծ հաջողությունների կապակցությամբ, մաղթում ենք Ձեզ նորանոր հաղթանակներ այս սուրբ ճանապարհին և Ամենակարող Աստծուց աղոթում ենք, որ Ձեզ պարգևի առողջություն ու մեծ հաջողություններ Ձեր առաքելության՝ Ադրբեջանի հզորացման և մեր ժողովրդի բարօրության ապահովման գործում․․․»։ Դրա տակ ստորագրել էին հենց վերոնշյալ Ալեքբերլին, որի գոյություն չունեցող հարցազրույցին հղում են անում, և մի քանի այլ պատգամավորներ։
Ես, իհարկե, շատ կուզեի, որ Ադրբեջանը հրաժարվեր իր զավթողական ծրագրերից, բայց ցավոք, դրա հետ կապված որևէ իրական փաստ չկա, իսկ կեղծիքին հավատալ ես չեմ ուզում և նաև իմ վերլուծություններին հետևողներին խորհուրդ չեմ տալիս։
Իսկ այս ամենը, իմ կարծիքով, արվել է արտաքին լսարանի, ինչու չէ նաև միգուցե մեր՝ հայկական հանրության աչքին թոզ փչելու համար»։