«Գրեթե ոչ ոք չգիտի՝ ինչպես օգնել հաշմանդամություն ունեցող մարդուն»․ Նարինե Ղալեչյան

Լրագրող Նարինե Ղալեչյանը ֆեյսբուքյան իր էջում տեսանյութ է տարածել՝ կից գրելով․ «Մենք այս հասարակության մի մասն ենք, որտեղ գրեթե ոչ ոք չգիտի, թե ինչպես շփվել, օգնել, աշխատել ու ձեռք մեկնել հաշմանդամություն ունեցող մարդուն։
Ենթադրաբար վարորդն էլ չգիտեր, որ բացվող թեքահարթակ ունեցող այս ավտոբուսները պետք է շատ մոտ կանգնեն մայթեզրին, որպեսզի սայլակով տեղաշարժվող մարդը կարողանա անմիջապես կանգառից մտնել ավտոբուս։ Պետք չէ իջնել, գրկել և այլն, ուղղակի պետք է պանդուսը բացել (եթե ավտոմատ չի բացվում, ապա միայն այդ դեպքում իջնել ու ձեռքով բացել)։
Ուղևորներն էլ պետք է հասկանան, որ եթե սայլակով մարդ է մտնում ավտոբուս, ապա պետք է դուրս գան նրա համար նախատեսված հատվածից։
Մեծ հույս ունեմ, որ աստիճանաբար կսովորենք։ Իսկ մայրը շատ ճիշտ էր անում, որ բացատրում էր, թե ինչպես պետք է սայլակով տեղաշարժվող ուղևորներին հնարավորություն տալ ավտոբուս մտնելու»։