«Խրատներ է տալիս բոլորին, սակայն գնահատական չի տվել իր քաղաքական անցյալին»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Հայաստանի վարչապետը քաղաքական, պատմական, բարոյական խրատներ ու խորհուրդներ է տալիս գրեթե բոլորին՝ ռամիկից մինչև հոգևորական:
Պարոն Փաշինյանը, սակայն, գնահատական չի տվել իր քաղաքական անցյալին, ինչի կարիքը կա:
Օրինակ, ՀՀ հիմնադիր հայրերից Քաջազնունին, Խատիսյանը, Վրացյանը և մյուսները Կարսի աղետից ու Հայաստանին արյունալի հարվածներ հասցրած բոլշևիկ-քեմալական գործակցությունից հետո քննադատել են իրենց իսկ մանկամիտ մաքսիմալիզմը:
Պարոն Փաշինյանը, սակայն, միայն մեկ անգամ է խոսել հայդատական ՔՊ-ի մասին ու վերջ:
Այսօր, խաղաղության մունետիկի դերի մեջ, պարոն Փաշինյանը կարող է ունենալ համարձակություն և դիմելով ժողովրդին բացատրել «Արցախը Հայաստան է և վերջ», Տավուշյան արկածախնդրության, Սևրի հարյուրամյակի հիշատակության իմաստը:
Քանի դեռ պարոն Փաշինյանը դա չի արել, հենց որ ուժը հերիքի, կասկած չունեմ, կվերադառնա պատերազմական հռետորաբանությանը:
Նա այսօր խաղաղության մունետիկ է, քանի որ պարտվել է ու այլ անելիք ու ասելիք չունի, քան խոսել խաղաղությունից, որը, ի դեպ, Հայաստանի համար այսօր միակ փրկությունը կարող է լինել:
Այլընտրանքը նոր պատերազմն է ու նոր կորուստները»։