«Հայաստանը գիտակցում է Իրանի «կարմիր գծերը»»․ Արաղչի

Հայկական կողմը լիարժեք պարզաբանումներ է տվել խաղաղության ծրագրի, ինչպես նաև տարանցիկ երթուղիների և վերջերս Վաշինգթոնում քննարկված երթուղիների վերաբերյալ։ Այս մասին հայտնել է Իրանի ԱԳՆ ղեկավար Աբբաս Արաղչին՝ Իրանի և Հայաստանի ղեկավարների հանդիպումից հետո։

Նրա խոսքով՝ Հայաստանը լիովին գիտակցում է Իրանի «կարմիր գծերը», հաշվի է առնում դրանք և հանձնառու է հարգել դրանք:

«Բացի այդ, հայկական կողմը երաշխավորել է, որ Հայաստանի տարածքից երբեք սպառնալիք չի լինի»,- ասել է Արաղչին։

Նախարարը նաև հայտնել է, որ համաձայնություն է ձեռք բերվել երկու երկրների միջև համապարփակ ռազմավարական համագործակցության վերաբերյալ փաստաթուղթը վերջնականապես մշակելու վերաբերյալ, որը կամրապնդի երկկողմ հարաբերությունները և կապահովի տարածաշրջանային հարցերի համակարգումը։