Սպիտակ տունը նշել է Թրամփի, Պուտինի և Զելենսկու հանդիպման հնարավոր վայրը

Politico-ն հաղորդում է, որ Սպիտակ տունը դիտարկում է Բուդապեշտը՝ որպես ԱՄՆ-ի, Ուկրաինայի և Ռուսաստանի նախագահների միջև հնարավոր եռակողմ հանդիպման վայր՝ պատերազմը դադարեցնելու հարցում առաջընթաց գրանցելու նպատակով։
Ըստ ներքին աղբյուրների՝ ԱՄՆ-ի գաղտնի ծառայությունն արդեն սկսել է նախապատրաստական աշխատանքները հնարավոր գագաթնաժողովի համար։ «Հունգարիան, որը գլխավորում է Դոնալդ Թրամփի հայտնի դաշնակից, վարչապետ Օրբանը, հանդես է գալիս՝ որպես բանակցությունները հյուրընկալելու առաջատար թեկնածու, չնայած վերջնական որոշում դեռևս չի կայացվել»,- նշում է աղբյուրը։

Սպիտակ տունը նաև հայտարարել է, որ Միացյալ Նահանգներն Ուկրաինայի և Ռուսաստանի հետ քննարկում է Պուտինի և Զելենսկու հանդիպման բազմաթիվ հնարավոր վայրեր, և Բուդապեշտը քննարկվող տարբերակներից մեկն է։

Աղբյուրները շեշտում են, որ Բուդապեշտը կարող է հարցեր առաջացնել Ուկրաինայի համար։ Քաղաքը կապված է 1994 թվականի Բուդապեշտի հուշագրի հետ, որը, ըստ Կիևի, չի ապահովել 2014 թվականի իրադարձություններից հետո խոստացված անվտանգության երաշխիքները։