Չինաստանն ընդլայնում է միջուկային զինանոցը, որպեսզի մինչև 2027 թվականը գրավի Թայվանը

912

Չորեքշաբթի, 20 օգոստոսի, 2025 թ., 21:30

Չինաստանը շարունակում է ընդլայնել իր միջուկային ուժերի չափերն ու հնարավորությունները, հաղորդում է Reuters-ը՝ հղում անելով ԱՄՆ-ի ռազմական փորձագետներին և զենքի վերահսկման մասնագետներին։
ԱՄՆ-ի ռազմավարական հրամանատարության (STRATCOM) ղեկավար, գեներալ Էնթոնի Քոթթոնը մարտին Քոնգրեսին ասել է, որ Չինաստանի նախագահ Սի Ցզինպինը հրահանգել է զինվորականներին պատրաստ լինել մինչև 2027 թվականը գրավել Թայվանը։ Նա նշել է, որ Պեկինը մեծացնում է միջուկային մարտագլխիկների արտադրությունը, որոնք կարող են արձակվել ցամաքից, օդից և ծովից։

Չիկագոյում գործող «Ատոմային գիտնականների տեղեկագրի» համաձայն՝ Չինաստանը ընդլայնում և արդիականացնում է իր զինանոցն ավելի արագ, քան ցանկացած այլ միջուկային տերություն: Նրա զինանոցում ներկայում կա մոտ 600 մարտագլխիկ։ Փենթագոնը կարծում է, որ մինչև 2027 թվականն այդ թիվը կարող է գերազանցել 1000-ը։

Ստոկհոլմի միջազգային խաղաղության հետազոտությունների ինստիտուտի (SIPRI) տվյալներով՝ 2025 թվականի հունվարի դրությամբ աշխարհում կար 12,241 միջուկային մարտագլխիկ։ Բոլոր միջուկային լիցքերի մեծ մասը գտնվում է Ռուսաստանում և Միացյալ Նահանգներում՝ համապատասխանաբար 4,309 և 3,700։ Ստոկհոլմի ինստիտուտի փորձագետները հաստատել են ԱՄՆ-ի գնահատականը Չինաստանի պաշարների աճի վերաբերյալ։

Չինաստանը հայտարարում է, որ հավատարիմ է միջուկային ոլորտում ինքնապաշտպանության ռազմավարությանը, առաջինը չի կիրառի միջուկային զենք և չի օգտագործի այն այնպիսի պետությունների դեմ, որոնք նման զենք չունեն։ Երկրի պաշտպանության նախարարությունը շեշտում է, որ «միջուկային պատերազմում հաղթանակ հնարավոր չէ»։