«Լուծում՝ ինչպես կրճատել վարորդական իրավունքի քննության հերթերը»․ Նաիրի Սարգսյան

Վարչապետ Նիկոլ Փաշինյանի նախկին օգնական Նաիրի Սարգսյանը ֆեյսբուքյան գրառումը․ «Մարդիկ գնում են վարորդական իրավունքի քննության, քննությունից կտրվում են, դուրս են գալիս, նստում են ոստիկանության շենքի բակում կայանած իրենց մեքենան և վարելով գնում տուն: Իհարկե, ամենահեշտ տարբերակը այդ մարդկանց օրինախախտ վարքագծի համար մեղադրելն է, բայց իրականում խնդիրն այլ տեղ է:
Հերթագրվում են տեսական քննության համար, 2-3 ամիս սպասում են քննության օրվան, 1 սխալի պատճառով կտրվում են և նորից սպասում նոր քննությանը: Տեսականը դրական ստանալուց հետո հերթագրվում են գործնական քննության համար, որի հերթը Երևանում 3 ամսից ավելի է (այսօրվա դրությամբ ամենամոտ օրը դեկտեմբերի 2-ն է): Այդ քննությունն էլ այնպիսի ծայրահեղ խստությամբ է ստուգվում, որ մարդիկ հաճախ դրական են ստանում միայն 4-րդ փորձից հետո: Փաստորեն վարորդական իրավունք ստանալը տևում է 1-2 տարի։
Այս թեմայով շատ բողոքներ եմ ստացել, բայց երեկվա նամակն ինձ ստիպեց բարձրաձայնել և լուծում առաջարկել։
Քաղաքացին գրել է, որ 2 ամիս հերթում սպասելուց հետո մտել է տեսական քննության սենյակ, առկա է եղել 8 համակարգիչ, բայց միայն 2 քննություն հանձնող: Այսինքն՝ ճիշտ կազմակերպելու դեպքում ևս 6 հոգի կարող էին այդ ժամին քննություն տալ։
Եթե քննություն կազմակերպողը լիներ շահույթ հետապնդող մասնավոր հիմնարկ, բացառվում է, որ հերթը լիներ 10 օրից ավելի։ Բայց քանի որ պետական հիմնարկ է, ոչ մեկին չի հետաքրքրում 3 ամսվա հերթը, նրանք սպասում են ժամը 18:00-ն գա, որ գնան տուն:
Երևանում կա մասնավոր բժշկական կենտրոն, որտեղ ՄՌՏ հետազոտություններն իրականացվում են մինչև գիշերը 23:00-ն՝ առանց հանգստյան օրերի, որպեսզի հասցնեն սպասարկել հերթը։
Նույն կերպ ՆԳ նախարարությունը կարող է լրացուցիչ աշխատողներ ներգրավել քննական ստորաբաժանումներում, թեկուզ միայն Երևանում և հերթափոխով աշխատել մինչև 23:00-ն։
Կարելի է շատացնել քննական սենյակները, համակարգիչները և գործնական քննության ավտոմեքենաները։
Եթե նոր աշխատող ներգրավելու փող չկա, կարող եք արտահերթ քննություն տալու համար պետական տուրք սահմանել։ Դա ծայրահեղ դեպքում, նախընտրելի է ամսական 3-4 մլն դրամը բյուջեի այլ տողից վերաբաշխումով բերել:
Սիրո՞ւմ ես հայրենիքդ, ուժեղացրո՛ւ պետությունդ:
Հ.Գ. Վարորդական իրավունքից զրկված ավեի քան 10.000 վարորդ կա, նրանց մեջ շատերը տաքսու վարորդ կամ առաքիչ են, ովքեր մեքենա վարելով տուն են պահում, հարկավոր է նրանց թույլ տալ կարճ ժամկետում քննություններ տալ և վարելու իրավունքը վերականգնել: Ավելի լավ է հերթը կրճատելու ուղղությամբ գումար ծախսել, քան այդ վարորդներին առանց իրավունքի վարելու համար ազատազրկելու ուղղությամբ՝ քննիչի, դատախազի, դատավորի աշխատավարձ, քրեակատարողական հիմնարկում սննդի լրացուցիչ ծախս և այլն»: