«Ադրբեջանը պետք է ցանկացած պահի պատրաստ լինի պատերազմի». Ալիևը` Քարվաճառում

Ադրբեջանը պետք է պատրաստ լինի պատերազմի ցանկացած պահի՝ հաշվի առնելով աշխարհում տեղի ունեցող գործընթացների անկանխատեսելիությունը, հայտարարել է Ադրբեջանի նախագահ Իլհամ Ալիևը բռնազավթված Քարվաճառում ադրբեջանցի նորեկների հետ հանդիպման ժամանակ։

«Իհարկե, մեր զինված ուժերը ամեն րոպե, ամեն օր պահպանում են մեր պետության շահերն ու անվտանգությունը։ Մենք դիտարկում, տեսնում ենք և կտեսնենք սպառնալիքների հնարավոր աղբյուրները։

Մենք մեծացնում ենք մեր ռազմական հզորությունը։ Երկրորդ Ղարաբաղյան պատերազմից հետո, մեր ուժերի զարգացման հետ կապված՝ ինչպես Կասպից ծովում, այնպես էլ մյուս բոլոր զինված ուժերում, մենք մեր հատուկ նշանակության ուժերի թիվը ավելացրեցինք հազարավոր կործանիչներով. չեմ ուզում ճշգրիտ թիվ նշել, բայց շատ, ստեղծվեցին նոր կոմանդոսային ուժեր։

Մեր երկիր են մատակարարվել ամենաժամանակակից անօդաչու թռչող սարքեր, նոր հրետանային համակարգեր։ Ստորագրվել են պայմանագրեր նոր մարտական ​​ինքնաթիռների գնման համար, իսկ եղածները լիովին արդիականացվել են։ Մենք պետք է պատրաստ լինենք պատերազմի ցանկացած պահի, քանի որ աշխարհում գործընթացների ընթացքն այնպիսին է, որ անհնար է կանխատեսել, թե վաղը ինչ կլինի։ Մեր անվտանգության երաշխավորը մենք ենք, պետությունը, ժողովուրդը և մեր զինված ուժերը։ Հետևաբար, եթե ինչ-որ մեկի հիվանդ գլխում միտք առաջանա որևէ սադրանք կատարել Ադրբեջանի դեմ, ապա կարծում եմ՝ նա կրկին կզղջա դրա համար։ Եվ այսուհետ մենք կապրենք որպես հաղթական ժողովուրդ և հաղթական պետություն»,- ընդգծել է հակառակորդ պետության ղեկավարը։