«Մեր խնդիրն է՝ իշխանությանը ճնշել, որպեսզի սկսի 102-րդ ռազմաբազային տուն ուղարկելու գործընթացը»․ Լևոն Բարսեղյան

«Այն պետությունը, որ պետք է պաշտպաներ ՀՀ-ին արտաքին սպառնալիքներից՝ ըստ իր ստանձնած պարտավորությունների՝ որպես ռազմավարական գործընկեր, պարզվեց, որ չպաշտպանեց։ Այն պահին, երբ պետք է ցույց տային, որ իրենք իրենց պայմանագրին հավատարիմ են, իրենց ստորագրությունը հարգում են, իրենք հրաժարվեցին այդ ծառայությունը մատուցելուց, օրինակները բազմաթիվ են»,- այս մասին ընդդեմ ռուսական 102-րդ բազայի կազմակերպված ակցիայի ժամանակ լրագրողների հետ զրույցում նշեց Գյումրիի «Ասպարեզ» ակումբի նախագահ Լևոն Բարսեղյանը։

«Երբ իրենք պիտի լինեին խաղաղարար և խաղաղապահ և պիտի պաշտպանեին արցախահայությանը, սուսուփուս համաձայնվեցին Լաչինի միջանցքի փակմանը․ խաղաղարար ուժերի արած գործը չտեսանք, բացառությամբ մի քանի տասնյակ արցախցի ընտանիքներին բերելը և հանձնելը ՀՀ իշխանություններին։

Չեմ ուզում թվարկել, թե ինչ այլանդակություններ են արել ՀՀ-ի հետ կապված՝ ի հակառակ իրենց պայմանավորվածության և պարտավորվածության։ Մեր խնդիրն է՝ հանրությանը բացատրել և իշխանությանը ճնշել, որպեսզի սկսի 102-րդ ռազմաբազային տուն ուղարկելու գործընթացը։ Այս իշխանությունը եթե դա չանի, հաջորդ իշխանությունները պիտի անեն»,- հավելեց Բարսեղյանը։

Հիշեցնենք՝ «Հանուն Հանրապետության» կուսակցությունն ու նրանց համակիրները, ինչպես արդեն հայտնել ենք, Գյումրիում տեղակայված ռուսական 102-րդ ռազմաբազայի մոտ բողոքի ակցիա են կազմակերպել: Նրանք պահանջում են, որ Հայաստանի իշխանությունը Գյումրիից դուրս բերի ռուսական ռազմաբազան: Նշենք, որ վաղ առավոտից ռազմաբազայում միացված են հայկական հայրենասիրական երգեր։