«Մի խավ կա, որ առավոտից-երեկո անծանոթ մարդկանց տեսանյութերի մեկնաբանություններում մտքի գոհարներ է շաղ տալիս». Վարդան Ոսկանյան

Իրանագետ Վարդան Ոսկանյանի ֆեյսբուքյան գրառումը․ «Դո՞ւք էլ եք նկատել, որ եզակի երկրորդ դեմքի ստացական «-դ» հոդի ուղղագրությունը տարրական դպրոցում այդպես էլ չյուրացրած և 40-50 տարեկանում էլ «-տ» գրող, հատուկ մի «խավ» կա, որն առավոտից-երեկո սոցցանցերի տարբեր հատվածներում անծանոթ մարդկանց տեսանյութերի մեկնաբանություններում մտքի գոհարներ է շաղ տալիս՝ դիցուք, «ուղեղտ չի աշխատում?» էպիստոլյար ոճի մեջ։
Ընդ որում, սրանք, որպես կանոն, հավակնում են ամեն ինչ իմանալու՝ սկսած 5-րդ դարի մութ անցքերից, վերջացրած՝ թե Թրամփը Պուտինի ականջին ինչ կարևոր բառեր է շշնջացել Ալյասկայում։
Դե, սրանց պրոֆիլի նկարներն էլ մեկ այլ պատմություն են, դիցուք՝ թիզ ու կեսից մի քիչ բարձր հասակով կանգնած «խրոխտ» տղամարդ, որը մի ձեռքում որսորդական հրացան ունի, իսկ մյուսում՝ դրանով խփած նապաստակն է, բայց կարևորը կանգնելու ձևն այնպիսին է, ասես՝ գրպանի դանակով բենգալյան վագր է սպանել»։