«Պուտինն ու Թրամփը խաղաղություն են ուզում, եվրոպացի գործիչները` ոչ». Լավրով

Ռուսաստանի և ԱՄՆ-ի նախագահներ Վլադիմիր Պուտինը և Դոնալդ Թրամփը «խաղաղություն են ուզում» Ուկրաինայում, սակայն եվրոպացի քաղաքական գործիչների գործողությունները ցույց են տալիս, որ իրենք դա չեն ուզում։ Այս մասին հայտարարել է Ռուսաստանի արտաքին գործերի նախարար Սերգեյ Լավրովը ամերիկյան NBC News հեռուստաալիքին տված հարցազրույցում։

«Մենք խաղաղություն ենք ուզում Ուկրաինայում։ ԱՄՆ նախագահ Թրամփը նույնպես խաղաղություն է ուզում Ուկրաինայում։ Անքորիջում հանդիպմանը, այս եվրոպացի ներկայացուցիչների Վաշինգթոն այցին և նրանց հետագա գործողություններին հաջորդող արձագանքը ցույց է տալիս, որ նրանք խաղաղություն չեն ուզում։ Նրանք ասում են, որ չեն կարող թույլ տալ, որ Ուկրաինան պարտվի։ Նրանք չեն կարող թույլ տալ, որ Ռուսաստանը հաղթի։ Սրանք այն կատեգորիաներն են, որոնք նրանք օգտագործում են՝ «հաղթանակ», «պարտություն» և այլն»,- ասել է Ռուսաստանի արտաքին գործերի նախարարը՝ հավելելով, որ Պուտինը նույնպես «խաղաղություն է ուզում»։
Լավրովը մեկնաբանել է ամերիկացի օրենսդիրների այն հայտարարությունները, որոնք ասում են, որ Ռուսաստանը «քթից բռնած տանում է Թրամփին»: «Օրենսդիրները կամ լրատվամիջոցները չպետք է որոշեն, թե ինչով է առաջնորդվում ԱՄՆ-ի նախագահ Թրամփը։ Մենք հարգում ենք նախագահ Թրամփին, քանի որ նա պաշտպանում է Ամերիկայի ազգային շահերը։ Ես հիմք ունեմ կարծելու, որ նախագահ Թրամփը հարգում է նախագահ Պուտինին, քանի որ նա պաշտպանում է Ռուսաստանի ազգային շահերը։ Այն, ինչ նրանք քննարկում են միմյանց միջև, գաղտնիք չէ»։ Լավրովը հարցազրույցում նաև ասել է, որ Ռուսաստանը չի համարում Ուկրաինայի նախագահ Վլադիմիր Զելենսկուն լեգիտիմ առաջնորդ, բայց ճանաչում է նրա կարգավիճակը՝ որպես փաստացի առաջնորդ։ «Մենք նրան ճանաչում ենք՝ որպես ռեժիմի փաստացի ղեկավար։ Այս կարգավիճակում մենք պատրաստ ենք հանդիպել նրա հետ... Երբ խոսքը վերաբերում է իրավական փաստաթղթերի ստորագրմանը, բոլորը պետք է հստակ պատկերացում ունենան, որ ստորագրողը լեգիտիմ է։ Ուկրաինայի Սահմանադրության համաձայն՝ Վլադիմիր Զելենսկին այս պահին այնտեղ չէ։ Այնպես որ, այո, Ռուսաստանի նախագահ Վլադիմիր Պուտինը պատրաստ է հանդիպել նրա հետ»,- ասել է Լավրովը, ինչպես մեջբերում են ռուսական լրատվամիջոցները։

Միևնույն ժամանակ, Լավրովն ասել է, որ «մենք չենք կարող հանդիպել պարզապես լուսանկարվելու և նրան (Զելենսկուն) հնարավորություն տալու՝ հայտարարելու, որ ինքը լեգիտիմ է։ Ի վերջո, լեգիտիմությունն առանձին հարց է։ Անկախ նրանից, թե երբ կարող է տեղի ունենալ այս հանդիպումը (և այն պետք է լավ պատրաստված լինի), շատ կարևոր է այն հարցը, թե ով կստորագրի փաստաթուղթը ուկրաինական կողմից»։

Լավրովի խոսքով՝ Ռուսաստանը նպատակահարմար չի համարում Վլադիմիր Զելենսկու և Վլադիմիր Պուտինի հանդիպումը, եթե այն կենտրոնացած է «շոումենների» կողմից ստեղծված «երևակայական էֆեկտի» վրա։ «Մենք նպատակահարմար չենք համարում հանդիպել, որպեսզի Զելենսկին ևս մեկ հնարավորություն ունենա ուշադրության կենտրոնում լինելու... Զելենսկին հրապարակավ հայտարարեց, որ չի պատրաստվում քննարկել որևէ տարածք, դրանով իսկ մարտահրավեր նետելով ԱՄՆ-ի նախագահ Դոնալդ Թրամփին և այլ ամերիկացի գործընկերներին», - վստահեցնում է Լավրովը։

Լավրովը պնդում է, որ Պուտինի և Թրամփի հետ Ալյասկայում զրույցում երկու նախագահների հանդիպման հարցը չի քննարկվել, նրանք խոսել են Ռուսաստանի և Ուկրաինայի միջև ուղիղ շփումների շարունակման մասին, որոնք սկսվել են Ստամբուլում։ Պուտինի և Զելենսկու անձնական հանդիպման թեման առաջացել է «իմպրովիզացված»։ Ավելի ուշ Վլադիմիր Պուտինն ԱՄՆ-ի նախագահ Դոնալդ Թրամփի հետ հեռախոսազրույցում «հստակ հայտարարել է», որ Ռուսաստանը պատրաստ է շարունակել ուկրաինական կողմի հետ ուղիղ բանակցությունները, որոնք սկսվել են Ստամբուլում։ Ռուսաստանի և Ուկրաինայի պատվիրակությունները, ասել է Լավրովը, «հանդիպել են և կհանդիպեն» Ստամբուլում։

Ռուսաստանի արտաքին գործերի նախարարության ղեկավարի խոսքով՝ Ուկրաինան իրավունք ունի գոյություն ունենալ այն պայմանով, որ «բաց թողնի» մարդկանց։ Մարդիկ, որոնց նրանք անվանում են «ահաբեկիչներ», «առանձնյակներ», որոնք Նովոռոսիայում, Դոնբասում, Ղրիմում մի քանի հանրաքվեներում որոշել են, որ պատկանում են ռուսական մշակույթին։